Къабарты-Малкъарны Жамауат палатасында абадан жыл сандагъы адамлагъа бла чекленнген онглары болгъанлагъа социал болушлукъ къалай этилгенин тинтгендиле.

Жыйылыучу ача, палатаны Социал политика, саулукъ сакълау, физкультура эм спорт жаны бла комиссиясыны башчысы Наталья Шинкарева кётюрюлген сорууну магъанасын белгилегенди.

Баш билдириуню урунуу эм социал къорууланыу министрни орунбасары Диана Далова этгенди. Ол билдиргенича, бу жаны бла иш «РФ-де инсанланы социал жумушларын тамамлауну юсюнден» 442-чю федерал законнга тийишлиликде бардырылады. Аны толтурууну чегинде регионда социал жумушланы тамамлагъан аслам къырал организация ишлейдиле, алада болушлукъ керекли адамлагъа къаралады, эм алгъа уа жангыз жашагъан къартлагъа бла сакъатлагъа. Абаданла эмда чекленнген онглары болгъанла жашагъан 4 юй-интернат бардыла, ол санда 2 психоневрология диспансер бла мыйыларында къыяулары болгъан сабийлеге юй да. Аланы бёлюмлери битеу районлада да ишлейдиле. Былада бир кереге 750 адамгъа къараргъа боллукъду, жыл сайын а профильли организациялада 40 минг саусуз багъыладыла.  

 Болушлукъ юйде тюрлюсю да кенг жайылыпды, анга кёре жамауатны белгиленнген къауумуна юйлеринде узун болжалны ичинде къаралады. Андан тышында, энчи аскер операциягъа къатышханланы юйюрлерине къайгъырыу уллуду, бюгюнлюкде 6467 юйюрге социал паспортла жарашдырылгъандыла.

 Жыйылыуда, андан сора да, талай магъаналы соруу кётюрюлгенди. Наталья Шинкарева социал таксини бусагъатдагъы ишлеу болжаллары абаданланы сакъатланы излемлерине келишмегенин айтханды. Билдирилгенича, аны бла жангызда ингирде сагъат алтыгъа дери хайырланыргъа боллукъду, адамлагъа ол кечирек заманда да керек болады. Аны орунбасары Олег Коздохов Социал жумушланы жалчытхан комплексли араланы бёлюмлерини ишлеринде тюзетиуле керек болгъанларына эс бургъанды. «Район эм шахар бёлюмлени борчларын бирикдирирге неда айырыргъа тийшлиди», - дегенди ол. Палатаны башчысыны орунбасары Людмила Федченко уа Республиканы комплексли арадан болушлукъ излеу хакъсызмыды, алагъа ахча къайсы бюджетден бёлюнеди, адамлагъа юйлеринден къараугъа къаллай излемле салынадыла деген сорууланы бергенди. 

Къабарты-Малкъарда Медико-социал экспертизаны баш бюросуну башчысыны къуллугъун толтургъан Ирина Шерметова озгъан жылда ишлерини эсеплери бла шагъырей этгенди. «2025 жылда инсанлагъа 15 934 освидетельствование этилгенди, ол а алгъадагъы жылдан 6,9 процентге кёпдю, ол санда 18 жыллары толмагъан 2284 сабийге да. Бу тинтиуню биринчи кере ётгенлени саны сабийлени, абаданланы араларында да ёсгенди», - дегенди ол.

Ирина Шерметова Тарчоков орамны жангыртыу бла байламлы сакъат адамлагъа бюрогъа келген къыйын болгъанын да айтханды. Аны бла байламлы палатаны келечилери Транспорт эм жол мюлк министерствогъа алайда ишлени теркирек тамамларгъа тилек жибергендиле.

Комиссияны келечилери 18 жыллары толмагъан сабийлени араларында чекленнген онглары болмагъанланы саны кёбейгенине жарсыуларын да билдиргендиле. Айтылгъаныча, 8-14 жыл санда психика жаны бла ауруула аслам тюбейдиле. Нодар Шарданов келтирген эсеплеге кёре, башха аурууланы араларында психоневрология жаны бла эмда кеслерин жюрютюуде тыйгъычлары болгъан сабийле эм кёпдюле.

Пенсия эм социал страхование фондну регионда бёлюмюню клиент службаланы ишлерин къурау управлениясыны башчысы Урчукъланы Артур билдиргенича, регионда бир кереге бериулиучю ахча болушлукъ (ЕДВ) 81 452 адамгъа къабыл кёрюлгенди. Аладан 19 295-си, аны социал жумушланы къатышдырмай, ахчалай аладыла. Ишлемеген пенсиячылагъа бла сакъатлагъа пенсияларына ахча къошакъла этиледиле. 2026 жылны 1 январына пенсиягъа регион къошакъ болушлукъну 69 916 адам алгъандыла, алагъа 387 828 918,09 сом бёлюннгенди.

Жыйылыуну ахырында сейирлери болгъан органлагъа эсгертиуле жарашдырылгъандыла, деп билдиредиле Жамауат палатаны пресс-службасындан.

Кульчаланы Зульфия.