Чегем районда Россейни халкъларыны бирлигини жылы къууанчлы халда ачылгъанды. Районну Маданият юйюнде бардырылгъан жыйылыугъа тюрлю-тюрлю тёлюлени келечилери, энчи аскер операциягъа къатышхан ветеранла, врачла, устазла, спортчула, студентле эм окъуучула къатышхандыла. Залны толу болгъаны бошдан тюйюл эди, нек дегенде Къабарты-Малкъарда ёмюрледен бери жюзден аслам миллетни келечиси къоншулукъда, шуёхлукъда эм бирликде жашайдыла. Ала бош сёзле тюйюлдюле, харкюнлюк жашауну белгилеридиле.

Къууанчлы жыйылыуну Россейни гимн согъууу бла башлагъандыла. «Бу магъаналы тюбешиуню мураты-миллетлени араларында бирликни андан да бек кючлерге эм деменгили къыралыбызны халкъларыны бай миллет хазналарын сакъларгъа эм айнытыугъа итиниудю. Бу ингирде бардырылгъан байрам ол жаланда район администрацияны Россейни халкъларыны  бирлигини жылына жораланнган жумушладан бириди. Къабыл этилген планнга кёре, районну эллеринде тюрлю-тюрлю тюбешиуле эм башха мероприятияла  сау жылны ичинде бардырылып турлукъдула, дегенди районну жер-жерли администрациясыны башчысыны орунбасары Жанна Арипшева.

Андан сора да, къууанчлы ингирде сёлешгенле ёмюрледен бери да Россейни ичинде жашагъан халкъла кеслерини тамырларын, тиллерин, адет тёрелерин унутмай, аны бла бирге бай хазналарын сакъларгъа эм айнытыргъа кюрешгенлерин чертгендиле. Къыйын кезиуледе, бирлешип, Ата журтларын жаудан къоруулагъандыла, къууанчларын, жарсыу кюнлерин да бирге ётдюргендиле, не заманда да бир бирге билеклик этгенлерин къатлап айтхандыла. 

Уллу залда къууанчлы ингир ётген кезиуде Маданият юйню аллында къуралгъан чынтты ачыкъ музей да ишин бардыргъанды. Республиканы миллет маданият аралары сейирлик бай хазналарын кёргюзтгендиле. Бурун заманлада жюрютюлген юй адырла, тау этеклеринде жашагъан халкъланы   кийимлери, художниклени аламат ишлери эм сабий суратла  да бар эдиле. Хар экспонат миллетлени бурун заманладан келген маданият хазналарын  туура этгенди.  
Жыйылыуну ахырында уллу концерт болгъанды. Республиканы чыгъармачылыкъ коллективлери залгъа жыйылгъанлагъа усталыкъларын кёргюзтгендиле.