Бу кюнледе Нальчикни 10-чу номерли мектебинде кёчгюнчюлюкге аталып  тюбешиу болгъанды. Школну директору Байрамкъулланы Фатимат Касаевна тюбешиуге жазыучу Османланы Хыйсаны чакъыргъан эди. 

Осман улу устазланы, окъуучуланы алларында атасындан, анасындан, башха абаданладан эшитип, тыш жеринде таулула къалай жан кечиндиргенлерини юсюнден хапарлагъанды.

– Орта Азиягъа  бла Къазахстаннга чачылгъан миллетибиз иш кёллюлюгю, гиртчилиги бла  кесин сакълагъанды, – дегенди Осман улу. – Туугъан жерлеринде кёрмеген ишлени этерге тюшгенде да, бир  адамдан артха къалмай, чюгюндюр, мамукъ да ёсдюргендиле, магъаданчыла болуп да ишлегендиле. Ол тийрелени адамларындан артха къалмай, иш мардаларын артыгъы бла толтуруп, алгъыннгы къыралыбызны эм бийик саугъаларына тийишли болгъандыла. Бир къауумуна уа  Социалист Урунууну Жигити деген сыйлы атла берилгендиле: Улбашланы Зулейхагъа, Ёзденланы Мариямгъа, Келеметланы Шохайыпха, Тетууланы Шамшюдиннге, Жангоразланы Ибрагимге.

Аладан сора да, заводлада, фабрикалада, магъадан къазгъан жерледе, къурулушда, жерчиликде уруна, кёп сыйлы саугъалагъа тийишли болгъандыла адамларыбыз, ол санда Диналаны Зулейха, Семенланы Зубиржат, Чеченланы Ханифа, Къазакъланы Кезибан, Шакъманланы Аминат, Къартлыкъланы Жанкъуш, Геккиланы Зухура эм дагъыда кёп башхала ишлеген жерлеринде алчыла болгъандыла. Хыйса, аладан сора да, урунууда атларын иги бла айтдыргъан кёп таулу тиширыуланы, эр кишилени юслеринден айтханды.

Онюч жылдан тюзлюк  тохташдырылып, халкъыбыз жерине  къайтхандан сора, жангыдан юйле, журтла ишледиле. Элледе ара мюлклени къурадыла. Ишден сора, кечеле бла  мектеплеге жюрюп, билим да алдыла. Юйюрле да къурап, сабийле да ёсдюрдюле. Бир миллетледен артха къалмай, къыралыбызгъа къуллукъ этгенлени юслеринден да хапарлагъанды къонакъ.

Андан сора соруулагъа жууапла да бергенди. Ызы бла уа кёчгюнчюлюкде болгъан эки къызчыкъны юслеринден жазылгъан «Къачыу» деген хапарын окъугъанды. Эсигизге салайыкъ, Осман улу бу хапарын Къазахстанны ара шахары Астанада бардырылгъан «Литературная Азия-2024» деген конкурсха  ашыргъан эди. Жюри анга гран-прини тийишли кёргенди.

Тюбешиу сейир халда  къуралып, окъуучуланы эслеринде къаллыгъы хакъды. Ахырында устазла, окъуучула да жазыучу бла суратха тюшгендиле. Тюбешиуню хазырлагъан малкъар тилден бла литературадан устаз Газайланы Фатима Солтановнагъа ахшы иши ючюн ыспас этгендиле

Лейлун улу Х.