Кёп болмай Къабарты-Малкъар къырал университетде «Биоэкономиканы технология бла жалчытыу»  миллет проектге аталып,  стратегиялы сессия болгъанды. Жыйылыугъа  белгили алимле, министерстволаны келечилери эм илму институтланы таматалары да къатышхандыла.

 КъМКъУ-ну ректоруну къуллугъун толтургъан Юрий Альтудов,  тюбешиуню ача, сессия бардырылгъаныны сылтауу  бир къауум шарт бла байламлы богъанын да билдиргенди. Анга КъМР-ни Башчысыны  регионну айнытыуда  илму-технология бёлюмню хайырланыу бла байламлы буйругъу, «Приоритет-2030» стратегиялы программагъа кътышханлары эм  алгъаракъда  Москвада келир заманны технологияларына аталгъан форум себеплик этгенди. 

 - Россейни Президенти форумну пленар кенгешине кеси къатышады. Ахырында чыгъарылгъан эсеплеге кёре, Правительствогъа тийишли эсгертиуле бериледиле. Аны бла бирге айырмалы проектлени бардырыргъа ахча бёлюнюрча "жол карта" да къуралады. Быйыл аллай магъаналы темаладан бирине биоэкономика саналгъанды. Бизге ол   сынауду аны бла бирге уа ахшы амалды. Келир заманда республиканы илму эм  билим бериу организацияларын  бирикдирип, ол регионну социал-экономика бёлюмюн айнытыуда къошумчулукъ этерча  мадар излерге  керекбиз. Аны бла  бирге  къыралдан болушлукъ табарча, биринчи эм магъаналы бёлюмлеге эс бурургъа тийишлиди,- дегенди Юрий Альтудов.

Тюбешиуде КъМКъУ-ну къыйматлы проектле жаны бла проректору Махийланы Танзиля республика къатышхан къырал программаланы "жол картасы" бла шагъырей этгенди. Ол технологияла жаны бла алчыланы къауумуна кирирча бюгюнлюкде ишлеген миллет проектлени эм алагъа берилген  ахча болушлукъну юсюнден да  тынгы хапарлагъанды.

Тюбешиуге къатышханла бирден КъМКъУ-ну башламчылыгъына ыразылыкъларын билдиргендиле. Вузну попечитель советини келечиси, мирзеуню качествосун тинтген араны бёлюмюню таматасы Хаути Сохроков да быллай тюбешиулени стратегиялы магъаналылыгъын белгилегенди. Ол  къыйматлы илму проеклени айыргъандан, жарашдыргъан сора да, ала жашауда хайыр келтирирча болургъа кереклерин  энчи чертгенди.

Сессияда проектлеге мурдорлукъ этерик илму-технология жаны бла концепция да белгиленнгенди.

КъМКъУ-ну агропромышленный комплексде декарбонизация бардырыуну эм регионал экономика жаны бла арасыны таматасы Амирхан Занилов быллай комплексли проектлени бардырыуда сынамыны юсюнден айтханды. Ол санда Билим бериу эм илму министерствосу бла Россейни илму фондуну жанындан билеклик этилгенин да айтханды.

 -  Биз,  жерни микроорганизмлеринден штаммла айырып, аланы мурдорларында битимлеге биопрепаратла къурайбыз эм производствогъа жиберебиз. Сынаула кёргюзтгенлерича,  бай эмда качестволу  тирлик жаланда  жер иги болса алыргъа жарайды,- дейди  Амирхан Занилов.

РАН-ны республикада илму арасыны  таматасы Залимхан Нагоев да проектге тири къатышыргъа сюйгенлерин эм кесини жанындан бир къауум къыйматлы проект бла юлюш къошаргъа хазырлыкъларын да  ачыкълагъанды. Сёз ючюн, ала  "селекция бла  урлукъчулукъ", "жалгъан акъылны эл мюлкге сингдирию"  эм "терек бахчалыкъда  роботланы тири хайырланыу" дегенча  башламчылыкъла бла байламлыдыла. 

 Ахырында жыйылыугъа къатышханла бюгюннгю проектлени  жаланда кооперацияланы кючю бла  толтурулургъа  жарарыгъын билдиргендиле.  Къабарты-Малкъар къырал университет  координатор болгъандан сора да, тийишли  кадрла бла жалчытырча да ауурлукъну кесине алгъанын,  арада аллай байламлыкъ - илмуну, билим бериуню эм производствону да комплексли халда ишлетирге  болушуругъу да белгиленнгенди. 

Магометланы Сулейман.