«РусГидро» энергетика компанияны Къабарты-Малкъарда бёлюмюню келечилери Атажукино элни ючюнчю номерли мектебинде тогъузунчу классланы окъуучуларына энчи тюбешиу къурагъандыла, деп билдиргендиле бёлюмню пресс-арасындан.

Бу окъуу юй Басхан ГЭС-ден узакъ бармай орналгъанды. Станция кеси да компанияны Къабарты-Малкъарда бёлюмюню бойсунуундады. Жаш тёлю бла тюбешиу «Неделя высоких технологий и технопредпринимательства» деген битеуроссей акцияны чеклеринде болгъанды.

Бу ишни компанияны «Корпоратив гидроэнергетика университет» арасы къурагъанды. Ол кеси да быллай проектлени бардырыргъа болушады. Араны специалистлери энчи окъуу материалла жарашдырадыла. Ала тюрлю-тюрлю жыллары болгъан школчулагъа аталып, алагъа тинтиуле бла кюреширге эмда кеслерини проектлерин къураргъа болушадыла.

Тюбешиу оюн халда ётгенди. Анга «Суу барыугъа оноуун эт» деп аталгъанды. Анга къатышхан школчула керти борчланы тамамларгъа кюрешгендиле. Быллай борчлагъа хар кюн сайын гидроэнергетик специалистле тюбейдиле. Ала ГЭС-леде ишлейдиле эм суу жыйылгъан кёллеге къарайдыла. Оюнну кезиуюнде школчула суу ресурслагъа оноу этерге кюрешгендиле. Ала тюрлю-тюрлю бёлюмлени сейирлерин эсге алыргъа керек эдиле. Сёз ючюн, электроэнергетика, кеме жюрюу, чабакъ мюлк эмда башхаланы. Сабийле шартланы тинтгендиле, къауум-къауум болуп,  оноула да этгендиле.

Оюн былай къуралгъаны бир ненча магъаналы зат этерге онг бергенди. Сабийле суу ресурсланы хайырланыуну жорукълары бла шагъырей болгъан бла къалмай, кеслерини хунерликлерин да айнытхандыла, бирге ишлерге, терен сагъыш этерге, адамланы алларына чыгъып сёлеширге да юйреннгендиле.

Битеуроссей технология Ыйыкъгъа себеплик этиуге компанияны ишинде тийишли магъана бериледи. Аны бла байламлы «Жангы школдан ишчи жерге» деген планы да барды - ол кадрланы хазырлау бла байламлыды. Компания школчуланы инженер эм энергетика усталыкълагъа сейирлерин къозгъаргъа сюеди. Келир заманны специалистлерини баш усталыкъларын айнытыу да анга магъаналыды. Ол бары да ишчилени компанияны излемлерин эсге алып хазырларча онгла къурайды.

Школлагъа да быллай ишлени бардырыу бек хайырлыды. Артыкъда бек ала компанияны Бахсан ГЭС кибик объектлерини къатында болсала. Быллай тюбешиуле производство бла окъууну арасында байламлыкъны кючлендириуге себеплик этедиле. Сабийлеге уа ким болуп ишлерге сюйгенлерин ачыкъларгъа болушадыла, ол санда аланы инженер усталыкъ бла да шагъырейлендиредиле.

Улбашланы Мурат.