Къабарты-Малкъарда «Умники и умницы» атлы  телеолимпиаданы онекинчи кезиуюню регион жарым финалы озгъанды. Эришиуню  темалары жазыучула Михаил Булгаковну, Фёдор Достоевскийни, Николай Некрасовну жашау эмда  чыгъармачылыкъ  жолларына аталгъандыла. Сабийлени билимлерине уа КМР-ни Парламентини председателини  орунбасары, жюриде даражалы археопаг Мурат Карданов, маданият министрини орунбасары Рита Таова, «Солнышко» журналны баш редактору Залина

Жерештиева, Нальчикде Сабийлени бла жаш тёлюню чыгъармачылыкъларыны юйюню директору Аксана Карашева багъа  салгъандыла. Аладан сора да, эришиуню хурметли къонагъы бу олимпиаданы  сегизинчи кезиуюнде хорлагъан, бюгюнлюкде КъМР-ни Жаш тёлю правительствосуну туризм министри Инар  Инароков да болгъанды.

Алай бла, эришиуге  къатышхан окъуучула, орус  литературадан терен билимлери  барлыкъларын ачыкълагъанларындан тышында да, тилде шатык сёлешалгъанларын да кёргюзтгендиле. Хорлагъанланы, санында ала уа ючеулен боладыла, Мирзоланы Самира да барды. Ол Тырныауузну биринчи номерли лицейини окъуучусуду. Олимпиаданы кезиулю урумуна агонист даражада  къатышырыкъды. Бирси 36 окъуучу уа анда  теориячыла боллукъдула. 

Эришиуню ахыр кесеги уа «Валерий Коков: жашаууну эмда къадарыны бетлери» деген тема бла бардырыллыкъды. Аны кезиуюнде  айырмалы болгъан ючеулен а, олимпиаданы къырал даражада озарыкъ кесегине  къатышып, анда да билимлерин ачыкъларыкъдыла. 

Мокъаланы Зухура.