Дзэлыкъуэ щIыналъэм хыхьэ Малкэ къуажэм иджы­благъэ щекIуэкIащ КъБР-м ЩэнхабзэмкIэ и ­министерствэм и зэIущIэ. Абы щытепсэлъыхьащ 2025 гъэм зэфIагъэкIахэмрэ мы илъэсым къапэщылъ къалэнхэмрэ.

ЗэIущIэм щыжаIахэр къы­зэщIэпкъуэжмэ, абы нэхъыщхьэу къыщыхагъэщащ нэгъабэ министерствэм и лэжьыгъэр унэтIыныгъэ зэ­мылIэужьыгъуэхэм тегъэ­щIауэ зэрыщытар. Абыхэм ящыщщ «Унагъуэ» лъэпкъ пэхуэщIэр гъэзэщIэныр, щэн­ха­бзэ IуэхущIапIэхэр зыхуей Iэ­мэпсымэхэмкIэ къызэгъэ­пэ­щыныр, гъуазджэр зи IэщIагъэм ядэIэпыкъуныр, цIыху­-бэ творчествэр ипэкIэ гъэ­кIуэ­тэныр, зэфIэкI зиIэ ныбжьы­щIэхэм защIэгъэ­къуэныр. Зи гугъу ящI пIалъэм гулъытэ нэхъыбэ зы­хуащIахэм ящыщщ щэнхабзэр хъумэ­нымрэ абы зегъэужьынымрэ, лъэпкъхэм, унагъуэхэм къадекIуэкI лъапIэныгъэхэмрэ хабзэхэмрэ гъэбыдэныр, тхыдэр ящIэ­ныр. Къапэщылъ къалэнхэм ящыщу къагъэлъэгъуащ лъэпкъхэм я щэнхабзэ хъу­гъуэфIыгъуэхэр хъумэныр, унагъуэхэм ядэIэпыкъуныр, щIыналъэм ис псори щэнха­бзэм и фIагъхэмкIэ гъэгуш­хуэныр. 
Къэбэрдей-Балкъэрым и щэнхабзэ IуэхущIапIэхэм я лэ­жьыгъэ куэд траухуащ ­УФ-м и Президент Путин Владимир 2025 гъэр Хэкум и ­хъумакIуэхэм я илъэсу зэ­ригъэувам. КъБР-м и Музыкэ къэрал театрым щекIуэкIащ абы ехьэлIа пшыхь гукъинэж. 
- Зи гугъу тщIы къалэнхэр гъэзэщIэным теухуауэ республикэм Iуэху куэд щекIуэ­кIащ: махуэшхуэ концертхэр, литературэ-макъамэ пшыхь­хэр ягъэхьэзыращ, щыIащ фестивалхэр, кином, гъуазджэм, музейхэм, библиоте­кэ­хэм я жэщхэр, сабийхэмрэ ныбжьыщIэхэмрэ я тхылъхэм я тхьэмахуэр щагъэлъэпIащ, Хэку зауэшхуэм ТекIуэныгъэ Иныр къызэрыщахьрэ илъэс 80 зэрырикъум, хэку лъа­гъуныгъэм теухуа Iуэхухэр ирагъэкIуэкIащ, Урысейм, урыс ныпым, цIыхубэ зэкъуэ­тыныгъэм, сэлэт мыцIыхум, Кърымыр, Донецк, Луганск цIыхубэ республикэхэр, За­по­рожскэ, Херсонскэ областхэр Урысейм къызэрыгухьэжам  я махуэхэр, нэгъуэщI­хэри ягъэ­лъэпIащ. ЩIыналъэм щып­сэухэмрэ хьэ­щIэ­хэмрэ зрагъэхьэлIащ гъэлъэгъуэ­ны­гъэхэм, кинохэм, лIыхъу­жьыгъэм и дерсхэм, тхыдэ сыхьэтхэм. Гулъытэ ин хуащI дзэ Iуэху хэхам хэкIуэда лIыхъужьхэм я фэеплъыр яхъу­мэным. Абы папщIэ бюстхэр, стеллэхэр ягъэуващ, жыгхэр хасащ, школхэм партэ щхьэхуэ щагъэуващ, - жиIащ КъБР-м щэнхабзэмкIэ и министр Къумахуэ Мухьэдин. - КъищынэмыщIауэ, лекцэхэр, зэп­сэлъэныгъэхэр, усэ къе­джэ­нымкIэ зэпеуэхэр, зэIу­щIэ­хэр, къэралымрэ респуб­ликэмрэ я тхыдэ фэеплъхэм ехьэлIа пэкIухэр къызэрагъэпэщащ. Апхуэдэу ирагъэ­кIуэкIащ зауэ уэрэдхэм я фестивалхэр, спорт зэхьэ­зэ­хуэхэр, дзэ Iуэху хэхам хэтахэм я зэIущIэхэр. Къызэ­щIэп­къуэжмэ, Хэкум и хъума­кIуэ­хэм я илъэсым къриубы- дэу Къэбэрдей-Балъкъэрым къы­щызэрагъэпэщащ икIи щрагъэкIуэкIащ зэхыхьэ 1500-рэ. ЩIыналъэм и хъыбарегъащIэ IэнатIэхэм я лэ­жьакIуэхэм а Iуэхугъуэхэм ­гулъытэ хуащIащ. 
Мы илъэсым зэфIагъэкIыну къапэщылъхэм я гугъу щи­щIым, министрым къыхигъэщащ федеральнэ Iуэхухэм хыхьэу, ЩэнхабзэмкIэ унэ­хэр, гъуазджэхэмкIэ школхэр, музейхэр, филармониер зэрызэрагъэпэщыжынур, сабийхэм папщIэ щэнхабзэ-егъэджэныгъэ центрхэр, модельнэ библиотекэхэр къызэ­рызэIуахынур, абыхэм тхылъ­хэр зэрыщIалъхьэнур. УФ-м и Президент Путин Владимир 2026 гъэр Урысейм и лъэпкъ­хэм я зэкъуэтыныгъэм и илъэсу зэригъэувам хыхьэу, гулъытэ ин хуащIынущ щIыналъэм щыпсэу лъэпкъхэм я зэкъуэтыныгъэр, зэгурыIуэ­ныгъэр, мамырыгъэр, абы­хэм я зэхуаку дэлъ пщIэр гъэбы­дэным, Урысейм ис лъэпкъ­хэм я щэнхабзэр хъу­мэным, нэгъуэщI щIыпIэхэм щыпсэу­хэр абы щыгъэгъуэ­зэным, сабийхэмрэ щIалэ­гъуалэмрэ я къэралым иригушхуэу къэгъэхъуным. УФ-м и ТхакIуэхэм я зэгухьэныгъэр илъэси 150-рэ зэрырикъум теухуа зэхы­хьэхэр мы гъэм дэнэ щIыпIи щекIуэкIынущ.
«1941 - 1945 гъэхэм екIуэкIа Хэку зауэшхуэм ТекIуэныгъэ Иныр къызэрыщахьрэ илъэс 80 ирокъу» фэеплъ медал­-хэр зэIущIэм щратыжащ ТекIуэныгъэ Иныр гъэлъэ­пIэ­ным теухуа зэхыхьэхэр къы­зэзыгъэпэща икIи езыгъэ­кIуэкIа, Хэку зауэшхуэм теу­хуа тхыдэ пэжыр хъумэным и мыхьэнэр щIыналъэм исхэм я деж нэхьэсыным, ныбжьыщIэхэм Хэкур фIыуэ ялъа­гъуу къэгъэхъуным хэлъ­хьэныгъэ хуэзыщI, щэнхабзэмрэ гъуазджэмрэ я лэ­жьа­кIуэ цIыху пщIы бжыгъэхэм. ЯгъэлъэпIахэм ящыщщ «Ни шагу назад» IуэхущIапIэм и унафэщIым и къалэнхэр зыгъэзащIэ Байсиев Темыржан, «КъБР-Медиа» къэрал кIэ­зонэ IуэхущIапIэм и уна­фэщI Бежан Беслъэн, Къэ­бэрдей-Балъкъэрым Щэн­ха­бзэ хъугъуэфIыгъуэхэр щыхъумэнымкIэ и управленэм  и унафэщI Гонтарь Олег, ­КъБР-м щэнхабзэмкIэ и министерствэм и къудамэхэм  я унафэщIхэу Къунаш Заремэрэ Тхьэкъуахъуэ Ас­те­мыррэ, «ЩоджэнцIыкIу Алий и цIэр зезыхьэ Къэбэрдей къэрал драмэ театр» къэрал кIэзонэ щэнхабзэ IуэхущIапIэм и унафэщI Пащты Ири­нэ, Къэбэрдей-Балъкъэрым и архив IуэхущIапIэм и уна­фэщI Щоджэн Щыхьым, «Арт зал Платформа» кIэзо­-нэ IуэхущIапIэм и унафэщI Шыхъуэстэн Аксанэ, волонтёр ПщыукI Аслъэн сымэ, ­нэгъуэщIхэри. 
ЗэIущIэм хэтащ икIи къыщыпсэлъащ Гъуазджэ­хэмкIэ Кавказ Ищхъэрэ къэ­рал институтым и ректор Рахаев Анатолэ, Дзэлыкъуэ щIыналъэм и администрацэм и Iэтащхьэм и къуэ­-  дзэ КъуэщIысокъуэ Iэсият, ­КъБР-м и Гуащэ театрым и унафэщI Гонтарь Людмилэ, Прохладнэ щIыналъэм и администрацэм и Iэтащхьэм и къуэдзэ ПщыцIыкIу Алеся, ­Iуащхьэмахуэ щIыналъэм и администрацэм щэнхабзэмкIэ и управленэм и унафэщI Толгуровэ Жаннет. 

ТЕКIУЖЬ  Заретэ.