Къабарты-Малкъар къырал университетде «Биоэкономика» деген жангы миллет проектге къатышыр мурат бла республиканы илму эм билим бериу организацияларын бирикдириуге аталгъан стратегиялы сессия бардырылгъанды.

Аны ача, КъМКъУ-ну ректоруну къуллугъун толтургъан Юрий Альтудов: «Бизни борчубуз – республикабызны бийик билим берген юйлерини бла илму араларыны онгларын бирикдирип, экономиканы бла социал болумну игилендириуню программасына къошулууну амалларын излеудю. Биз къыралны, ол санда Къабарты-Малкъарны да, къадарларын белгилерик ишледе къыралны жанындан болушлукъ алыргъа итинирге керекбиз», – деп чертгенди.

Тюбешиуге къатышханла биотехнологиялада, эл мюлк ишледе эм аш-азыкъ чыгъарыуда илму тинтиулени бардырыуну, илму-технология консорциум къурауну онгларын сюзгендиле.

Ахырында федерал проектлеге къатышырыкъланы заявкаларын терк хазырларыкъ ишчи къауумну къураргъа оноу этилгенди. Ол жумушланы бирикдириуню КъМКъУ кеси боюнуна алып, заявкаланы хазырлау жаны бла  экспертизаны къурарыкъды. Алай проектлени жарашдырыуда  башхаланы оюмлары да эсге алынырыкъдыла.

Кючмезланы Айза.