Къабарты-Малкъарны Перинатал арасында кюн сайын кёп бала тууады. Аланы араларында ауурлукълары 500 граммгъа жетмегенле да бардыла. Болсада мында ишлеген врачланы, медсестраланы билимлери, сынаулары да бийик болгъанларыны, тириликлерини хайырындан аллай къагъанакъчыкъла сау къаладыла. Жылны ичинде Перинатал арада ауурлукълары бек аз болуп 20-30 бала тууады. Бизни республикада аланы  90 процентини жашауларын сакъларча мадар этиледи.  Ол къыралда орта эсеп бла белгиленнген кёрюмдюден иги да мажалды.  Аны баш сылтауларындан бири ауурлукълары болгъан эм къыйналыргъа тюшген  тиширыула заманында Перинатал арагъа тапдырылгъанлары ахшы себеплик этеди. Бийик медицина технологияланы хайыры бла ананы эм баланы да саулугъуна  заран жетмезча мадар этиледи.

Ол санда арада болжалларындан алгъа тууаргъа тюшген эм саулукъларында бир тюрлю кемчиликлери болгъан   сабийлени жашауларын сакъларча  къыйын операцияла да  бардырыладыла. Эсге сала айтсакъ, арт заманлагъа дери аллай операцияланы этерге   федерал аралагъа жиберип тургъандыла.

Энчи белгилерча шартладан бирине былтыр октябрьде  алты айында кесарево  этилип  туугъан къызчыкъны айтырчады. Аны ауурлугъу 495 граммгъа жетмегенди, кеси да  болмагъанча  онгсуз эди.  Болсада сынамлы специалистлени хайырындан, заманында тийишли болушлукъ тапдырылып,  аны ёлюмден сакълагъандыла.  Эки ай бла жарым чакълы бирни  къолларындан келгенни аямагъандыла. Ол аппаратсыз  кеси аллына солуп башлагъанда уа,  анасына эм  персоналгъа да уллу къууанч болгъанды.   Ауурлугъу  1300 граммгъа жетгенде,  экинчи этажгъа патологиялары болгъан  эм эртте туугъан сабийлени бёлюмюне жатдыргъандыла. Бир къауум замандан иги ашап, ауурлугъуна къоша тебирегенди эм солууу  да игиге айланнганды. Алай бла,  алты ай чакълы бирден сора, аны ауурлугъу 2770 граммгъа, узунлугъу уа 46 сантиметрге жетгенди. Саулугъуна  къоркъурча болмагъандан сора,  балачыкъны анасы бла бирге  юйюне жибергендиле.

Эсге сала айтсакъ, былтыр Перинатал арада болжалларындан алгъа туугъан,  ауурлукълары да  бир килограммгъа жетмеген 22 сабий  жаратылгъанды.

Магометланы Сулейман.