КъМКъУ-ну келечилери Луганскны къырал педагогика университетинде къонакъда болгъандыла. Тюбешиу ЛГПУ-ну 105-жыллыгъын белгилеу бла байламлы къуралгъанды. Аны кезиуюнде уа, бизни окъуу юйюбюзню профсоюзла организациясыны таматасы Игорь Кобозев ЛНР-ни Халкъ советини депутаты Павел Пилавовха аланы ишчилерин эмда студентлерин Минги тауну тийресине чакъырыулары бла къагъытланы бергенди.
– Луганскны къырал педагогика университети – ол билим бериуню, тёрелени эмда жангычылыкъланы энчи жериди. Биринчиден а, мында вузну айныууна къайгъыргъанла ишлейдиле. Биз сизни бла шуёхлукъ тутханыбызгъа, байламлыгъыбыз барлыгъына къууанабыз. Келир заманда аслам бирикген проектибиз болуруна да ийнанабыз, – деп чертгенди.
Андан тышында да, КъМКъУ-ну келечилери ЛГПУ-ну ректору, ЛНР-ни Халкъ советини депутаты Жанна Марфина эмда къонакъбай окъуу юйню администрациясы бла биргеликде, «Мени устазым» деген скульптуралы композициягъа гюлле салгъандыла. Харфлыкъны музейини къууанчлы халда ачылыууна къатышып, аны Россейни халкъларыны бирлигини жылында хайырланылыргъа берилгенин да ахшы шартха санагъандыла.
Музей а ЛНР-ден РФ-де сенатор Ольга Басны башламчылыгъы бла къуралгъанды. Ол бу проектни жашауда бардырыугъа тири къатышады. Университетни таматаларыны тутхучлукълары бла мында Россейни жер-жерлеринден бла къоншу къыралладан сейирлик экспонатла жыйышдырылгъандыла.
ЛГПУ-ну байрамын белгилеу бла байламлы къууанчлы жыйылыуда уа, КъМКъУ-ну экономикалы эмда стратегиялы айныу жаны бла проректору Аслан Пшигошев да сёлешгенди. Ол жыйылгъанланы ректорну къуллугъун толтургъан Юрий Альтудовну атындан да алгъышлагъанды.
– Окъуу юйню юбилейин белгилей, сиз аны тарыхы, бай тёрелери эмда усталыкъдан жетишимлери бла ёхтемленирге эркинсиз. Бу байрам кюнледе биз аны тагыларында сюелгенлени, билим бериуню эмда илмуну айныта, университетни даражасын бийикге кётюре, аны педагогика жаны бла хунерлиликни чынтты арасына бургъанланы хурметлейбиз. Бизни университетлерибизни араларында байламлыкъ энди тутхучлу шуёхлукъгъа айланып, мындан арысында да бирге ишлеуню мурдору болгъанлай къалады. Биз ышанабыз, сизни сынамыгъыз эмда усталыкъ жаны бла бийик даражалы хунеригиз, таркъаймагъан ийнанмакълыгъыгъыз – барысы да деменгили къыралыбызда билим бериуню айныууна сезилирча къошумчулукъдула, – дегенди Пшигошев.
Ызы бла ол ЛГПУ-гъа бизни университетден саугъаны – спорт оборудованияны – къонакъбайлагъа бергенди.
Къууанчлы кюнлени кезиуюнде Луганскны къырал педагогика университетини осуйлукъ этген эмда алимлик советлерини башламчылыкълары бла чыгъарылгъан «Къуралыулу байламлыкъ ючюн» атлы белги бла Юрий Альтудов саугъаланнганды.
ЛГПУ-ну келечилери Къабарты-Малкъар къырал университетге ала бла кёп жылланы байламлыкъда ишлегени ючюн ыразылыкъларын билдиргендиле. Мындан арысында да, къыралда билим бериуню эмда илмуну айныуларына къошумчулукъ эте, тюрлю-тюрлю проектле бла биригиулюкде ишлериклерине, жетишимли да болурларына ийнаннганларын да айтхандыла.
Трамланы Зухура.
