Бараз кюн КъМР-ни Парламентинде ЛДПР фракцияны келечиси Владимир  Безгодькону башчылыгъында бу  партияны  келечилери Газайланы Масхут, Таукенланы Залина, Елена Туманова, Александр Гедугошев, Олег Доценко, Кючмезланы Мадина Миллет музейде Джаппуланы Езетханны эм аны бла бирге таулу кийизлеге жангы жашау бере ишлеген огъары басханчы тиширыуланы кёп болмай ачылгъан «Туугъан Малкъарымы жылыуу» деген  кёрмючлерине къараргъа келгендиле. Аны бла ала малкъар халкъны маданиятына бла хазнасына сый бергенлерин кёргюзтгендиле.  Алагъа музейни таматасы Феликс Наков тюбеп, республиканы бай тарыхы бла шагъырей этгенди. 
Кийизлени кёрмючю къонакъланы сейирлерин туудургъаны хакъ эди. Ала болмагъанча аламат кийизле къаллай амал бла, къаллай бир заманнга жарашдырылгъанларын да соргъандыла. Ёмюрлени теренинден келген къол  усталыкъгъа башха  миллетлени келечилери аллай уллу эс бургъанлары кёлюбюзню кётюргенди. Малкъар халкъ не жаны бла да чемер болгъаны бизни ёхтемлендиреди. 
Бу кёрмючде алыкъа болмагъан хар таулу да барып аны кёрюрге борчлу сунама. Ол мартны ахырына дери ишлерикди.