КъБР-м и Iэтащхьэ КIуэкIуэ Казбек ди республикэм и къалащхьэ Налшык дыгъуасэ лэжьыгъэ IэухукIэ щыхуэзащ УФ-м и Президентым Кавказ Ищхъэрэ федеральнэ щIыналъэм щиIэ полномочнэ лIыкIуэ Чайкэ Юрий. КъулыкъущIэхэр тепсэлъыхьащ ди щIыналъэм щыщыIэ щытыкIэм.
ЗэIущIэм зэрыщыжаIамкIэ, ди республикэм и экономикэм зиужь зэпытщ. Къэбгъэлъагъуэмэ, мэкъумэш IэнатIэм къыщалэжь продукцэм, илъэс блэкIам еплъытмэ, проценти 4,6-кIэ хэхъуащ, промышленностым - проценти 4,1-кIэ, сату Iуэхум проценти 8-м нэскIэ зиужьащ. БлэкIа мазитIыр къапщтэмэ, республикэ бюджетым хэхъуэу иIар процент 20-кIэ нэхъыбэщ, нэгъабэрейм еплъытмэ.
ЩIыналъэм ику иту къыщалэжь улахуэм процент 12,5-кIэ хэхъуащ икIи лэжьапщIэр ику иту сом 53251,6-м нэсащ. ЦIыхухэм хэхъуэу яIэр проценти 9,6-кIэ нэхъыбэ хъуащ. Мы илъэсым къриубыдэу яубзыхуа социальнэ дэIэпыкъуныгъэхэм ящыщщ КъБР-м Лэжьыгъэмрэ цIыхухэм социальнэу ядэIэпыкъунымкIэ и министерствэм къыбгъэдэкIыу цIыху щхьэхуэхэм иратыну сом мелуан 600,7-р, егъэджакIуэхэм я улахуэм дыщIагъуну мелуан 874,7-р.
Лъэпкъ проектхэр къызэрыхалъхьэ лъандэрэ блэкIа зэманым къриубыдэу республикэм дапщэщи ехъулIэныгъэкIэ щагъэзащIэ абыхэм къыщыгъэлъэгъуа Iуэхугъуэхэр, КИФЩI-м щыпашэхэм ящыщу. БлэкIа илъэсым къриубыдэу гъэзэщIа хъуащ мураду зыхуагъэувыжауэ щыта унэтIыныгъэ 84-м ящыщу 83-р. Планым къыщыгъэлъэгъуауэ щыта объекти 105-м ящыщу псори и чэзум ятащ. А ехъулIэныгъэхэр къапэкIуащ федеральнэ гъэзэщIакIуэ IэнатIэхэмрэ щIыналъэм и министерствэхэмрэ тэмэму зэрызэдэлажьэм.
Дызэрыт илъэсми республикэм лэжьыгъэ куэд къыпэщылъщ: лъэпкъ проектхэр гъэзэщIэным хухахащ мелард 14,8-рэ. Ахэр трагъэкIуэдэнущ объекти 130-м щIигъум щрагъэкIуэкIыну ухуэны-гъэхэм, зэгъэпэщыжыныгъэ, егъэфIэкIуэныгъэ лэ-жьыгъэхэм. Апхуэдэхэщ сабий гъэсапIэхэр, еджапIэхэр, колледжхэр, медицинэ, спорт, щэнхабзэ IуэхущIапIэхэр, гъуэгу IэнатIэр, егъэфIэкIуэныгъэ Iуэхухэр. КъинэмыщIауэ, техникэ и лъэныкъуэкIэ ирагъэфIэкIуэнущ социальнэ IэнатIэу 250-рэ.
КIуэкIуэ Казбек фIыщIэ ин хуищIащ Чайкэ Юрий ди щIыналъэм къыхуищI гулъытэм щхьэкIэ, ди республикэм и цIыхухэм я дежкIэ мыхьэнэшхуэ зиIэ проектхэмрэ программэхэмрэ тэрэзу гъэзэ-щIа хъунымкIэ сэбэп зэрыхъум папщIэ.
