КъМР-ни Парламентини президиумуну жыйылыуунда «правительстволу сагъатда» депутатла регионда къурулуш сфера къалай айныгъанын сюзгендиле. Нальчикде «Восточный» эм «Мей» микрорайонлагъа энчи эс бурулгъанды. Сюзюу Къурулуш, жашау журт-коммунал мюлк эм отлукъ-энергетика жаны бла комитетни башламчылыгъы бла къуралгъанды.
Кенгешни ача, Парламентни башчысы Татьяна Егорова контроль-аналитика жумушланы чеклеринде депутатла президиумну къараууна артыкъда магъаналы, энчи эс бурулургъа керекли сорууланы бергенлерин айтханды.
- КъМР-ни Башчысы Казбек Коков къурулуш регионну экономикасына уллу юлюш къошханын, ахыр жыллада ол иги айныгъанын белгилегенди. 2025 жылда алты жангы школ, Нальчикде 1-чи номерли поликлиника, Кенжеде амбулатория эм башха объектле хайырланыргъа берилгендиле. Къурулушну ёлчемине кёре биз Шимал-Кавказ федерал округда, Россейде да алчылагъа чыкъгъанбыз,-дегенди ол.
Алай кемчиликле да бардыла. Аланы арасында Татьяна Борисовна къурулуш организацияла ишлерин кереклисича толтурмагъанларына тарыгъыула кёбейгенлерин белгилегенди. Ол санда жашау журтла болжалында хайырланыргъа берилмеген кезиуле бардыла.
- Кенгешни аллында депутатла Парламентни башчысыны орунбасары Жанатайланы Салим, Къурулуш министерствону, Нальчикни администрациясыны эм къурулуш компанияланы келечилери бла бирге «Восточный» микрорайонда жол, социал эм башха объектледе, Республикалы кёп функциялы гимназияда да болгъандыла. Ала Къурулушну эм ЖКХ-ны айнытыуну стратегиясы къалай тамамланнганын «ичинден» кёргендиле,-дегенди спикер.
Сюзюлген теманы юсюнден къурулуш министрни къуллугъун толтургъан Андрей Журавлёв эм Нальчикни администрациясыны башчысы Таймураз Ахохов докладла этгендиле.
Андрей Журавлёв билдиргенича, былтыр къурулуш сферада 45,8 миллиард сом багъасы жумушла толтурулгъандыла, ол а аны аллында жылны кёрюмдюлерини 102 проценти тенглиди. КъМР-де Къурулушну эм ЖКХ-ны айнытыуну стратегиясына кёре, 2035 жылгъа дери бир жылгъа 761 минг квадрат метр жашау журт ишлетилирге керекди.
2025 жылда битеу иели организацияла бла энчи иелиле 642,5 минг квадрат метр жашау журт ишлетгендиле, быйыл а аны 580 минг квадрат метрге жетдирирге белгиленеди.
Бюгюнлюкде 22 жерни комплекс айнытыу жаны бла оноула чыгъарылгъандыла. Аланы битеулю кенглиги 263 гектаргъа жетеди. Жер-жерлени комплекс айнытыу (КРТ) жаны бла 14 келишим этилгенди. Аладан 13-сю Нальчикде, бири – Нарткъалада.
2023-2025 жыллада кёп къатлы 16 жашау журтну къурулушуна эмда энчи иелиле жашау журт ишлеп башлагъанларыны юслеринден 36 эсгертиуге эркинликле берилгендиле. Жер-жерлени комплекс айнытыуну чеклеринде ишлетилген мекямла 2030 жылгъа дери битдирилирге керекдиле.
Былтыр суу бла жалчытыу объектлени ишлетиу эм жангыртыу жумушла башланнгандыла. Дагъыда 2025 жылда жамауат бирге солугъан 40 жер жангыртылгъанды, ол а регионну инвестиция онгларын игилендиреди. Бу жумушлагъа 265 миллион сом къоратылгъанды. Быйыл а муниципалитетледе объектлени тапландырыугъа эм ишлетиуге 234 миллион сом, битеуроссей конкурслада хорлагъанлагъа уа 330 миллион сом бёлюнюрюкдю.
Нальчикде «Восточный» эм «Мей» микрорайонланы къурулушлары бардырылады. Проектни 2030 жылгъа дери битдирирге белгиленеди. «Восточныйде» 1 миллион квадрат метр, «Мэйде» уа 300 минг квадрат метр жашау журт ишлетирге планла салыннгандыла.
Быйыл къурулуш сферада 51 миллиард сом багъасы жумушла толтуруллукъдула.
Андрей Журавлёв былтыр хайырланыргъа берилген объектлени юслеринден да билдиргенди, быйылгъа муратланы юслеринден да айтханды. Сёз жашау журт-коммунал сфераны болумуну юсюнден да баргъанды.
Таймураз Ахохов а былтырны 11 айында къурулуш сферада тамамланнган жумушланы эсеплери бла шагъырей этгенди. Росстатны шартларына кёре шахарда былтыр 539 миллион сом багъасы жумушла толтурулгъандыла, 2499 фатар ишлетилгенди, аланы битеулю кенглиги 215,5 минг квадрат метрди.
2019 жылдан бери уа шахарда къурулуш жумушла Жер-жерлени комплекс айнытыу мадарла бла тамамланадыла. «Мей» эм «Восточный» комплексле аны чеклеринде ишлетиледиле. Правительство аланы регионну социал-экономикасын хайырлы айнытхан проектлени тизмесине къошханды. 2030 жылгъа дери былайда керекли инфраструктурасы бла жашау журтла ишлетилликдиле, алада 50 минг адамгъа журтла боллукъдула.
Жер-жерлени комплекс айнытыу проектни чеклеринде 13 келишим этилгенди. Аланы асламы «Восточный» микрорайонда тамамланадыла. 146 гектар жерде къурулуш барады, анда ишлетилген жашау журтланы кенглиги миллион квадрат метрге жетериги белгиленеди. Бюгюнлюкде анда 63 кёп къатлы жашау журт бла энчи иели 43 мекям битдирилгенди.
«Жашаргъа жарамагъан журтланы азайтыуну жалчытыу» федерал проектни тамамлагъанда кемчиликлени бла чырмауланы юслеринден да айтылгъанды.
КРТ-ны чеклеринде этилген келишимлеге кёре, 2030 жылгъа дери муниципал иеликге хакъсыз 13,8 минг квадрат метр жашау журт ётдюрюллюкдю – ол манёвр фондну къураргъа онг береди.
2024 жылда «Восточный» микрорайонда 246 юйюрге фатарланы ачхычлары берилгенди. Ала оюлургъа къоркъуулу юйледен кёчюрюлгенле эм жашау халланы игилендирирге керекли инсанла эдиле.
– Бу иш быйыл да бардырылады. 31 январьда 124 фатар берилгенди. Алай бла эки жылны ичинде оюлургъа къоркъуулу алты мекямдан эм коммунал юйледен адамла жангы фатарлагъа кёчюрюлгендиле. Жашау болумларын 363 юйюр игилендиргендиле, – дегенди докладчы.
Дагъыда мекямланы биринчи къатлары да шахаргъа хакъсыз бериледиле. Алада уа библиотекала, искусствону школлары, полицияны бёлюмлери эм башха социал объектле къураллыкъдыла. Микрорайонда школла, сабий садла да ишлетилликдиле. Таймураз Ахохов суу бла жалчытыуну юсюнден да айтханды. Бу жумушла миллет проектни чеклеринде тамамланадыла.
«Мей» микрорайонну юсюнден айтханда, къурулуш ишле 2022 жылда башланнгандыла, аланы жети жылны ичинде бошаргъа керекди. Былтыр бир жашау журт хайырланыргъа берилгенди, аны кенглиги 22 минг квадрат метрди. Быйыл да эки жашау журт битдирилликди. Энтта сегиз объект ишлетиле турадыла.
Докладланы сюзе, депутатла Парламентге айырыучуладан келген тарыгъыуланы юслеринден айтхандыла. Алада жангы юйледе фатарланы багъасыны, мекямны ишлетиуге ахчаларын къошхан инсанланы эркинликлерин сакълауну, социал жашау журтланы юслеринден барады сёз.
Къурулуш, ЖКХ эм ТЭК жаны бла комитетни башчысы Заурбек Кумалов «Восточный» микрорайонну болуму бла шагъырейленнгенде, анда керекли инфраструктура къуралгъанын кёргенлерин айтханды. Ол битеу жууаплы органла уллу иш бардыргъанларын да чертгенди.
Кенгешде айтылгъанны эсге алып, жууаплы органлагъа эсгретиуле хазырланнгандыла.
КъМР-ни Парламентини
пресс-службасы
