Мэлбахъуэ Тимборэ и цIэр зезыхьэ Лъэпкъ къэрал библиотекэм и лъахэхутэ къудамэм и лэжьакIуэ, «Гум и макъ» клубым и унафэщI Безыр Ленэ зэхыхьэ къызэригъэпэщащ адыгэ усакIуэ, драматург, Хэку зауэшхуэм и ветеран Чым Тембот къызэралъхурэ илъэси 115-рэ зэрырикъум теухуауэ.
Зэхыхьэр щекIуэкIа пэшым дапхъэ щагъэуващ «УсакIуэ, драматург, зауэлI» жиIэу тетхауэ. Абы телът тхакIуэм къыдигъэкIа тхылъхэр, езым теухуауэ ятхахэр. Чым Тембот и усэхэм щыщ ихуащ МэшылI Екатеринэ итха «Япэ лъэбакъуэ зычахэр» тхылъым. КъинэмыщIауэ, Шортэн Аскэрбий и «Театральное искусство Кабардино-Балкарии» къыдэкIыгъуэм хагъэхьащ абы и гуащIэм теухуа тхыгъэ. ЩоджэнцIыкIу Алий и цIэр зезыхьэ унэ-музейм и унафэщI Шакъ Марьянэ Чым Тембот и гъащIэмрэ и тхыгъэхэмрэ триухуащ «Национальные истоки кабардинской драматургии» къэхутэныгъэ лэжьыгъэр. Чым Тембот Хэку зауэшхуэм щызэрихьа лIыгъэм теухуа тхыгъэ хагъэхьащ томитху хъууэ къыдэкIа «Боевая слава Кабардино-Балкарии» тхылъым.
Безыр Ленэ тепсэлъыхьащ Чым Тембот и гъащIэмрэ гуащIэмрэ. ТхакIуэр Лэскэн щIыналъэм хыхьэ Анзорей къуажэм 1911 гъэм гъатхэпэм и 8-м къыщалъхуащ. ЗэхъуэкIыныгъэхэм я зэманым я унагъуэр Псыкуэд къуажэм Iэпхъуат. Курыт еджапIэ нэужьым, ар зэрыгурыхуэр зыщIэ и адэм, Бахъсэн къалэм и интернатым еджакIуэ игъэкIуащ. ЕхъулIэныгъэкIэ интернатыр къиухри, ЛУГ-м щIэтIысхьащ. Абы къыщызэрагъэпэща театр, литературэ гупжьейхэм Чымыр хэтащ жыджэру.
И IэдакъэщIэкIхэр республикэм и литературэм и хэлъхьэныгъэфI хъуащ. Дон Iус Ростов 1931 гъэм щекIуэкIа бгырыс лъэпкъхэм я япэ гъуазджэ олимпиадэм щагъэлъэгъуащ Чым Тембот итха «Старики» гушыIэ пьесэм къытращIыкIа спектаклыр, роль нэхъыщхьэр езы Тембот игъэзащIэу. Олимпиадэм увыпIэфI къыщыхуагъэфэщащ драматургым, ар щитха зэманым пэджэж пьесэм, куэдым ягу дыхьауэ, Iэгуауэшхуи хуаIэтат.
Совет властыр щызэфIэувэ зэманым тхэн щIэзыдза Чым Тембот нэгъуэщI пьесэхэри и Iэдакъэ къыщIэкIащ. Ди жагъуэ зэрыхъунщи, ахэр ди деж къэсакъым. Абы и усэхэм лъабжьэ яхуэхъуащ а зэманым щыIа цIыхухэм я щыIэкIэ-псэукIэр. И тхыгъэхэм цIыхухэр къыщыхуриджэрт яухуэ гъащIэщIэм жыджэру хэтыну. А гупсысэр щоIу «Горянка», «Кооперация», «Дети, внимание!» усэхэм.
Хэку зауэшхуэм щызэрихьа лIыгъэр къалъытэри, Чым Тембот щэнейрэ къыхуагъэфэщащ «Бэракъ Плъыжь» орденыр, тIэунейрэ къратащ «Вагъуэ Плъыжь» орденымрэ «Хэку зауэшхуэ» орденымрэ я япэ нагъыщэхэр.
ТЕКIУЖЬ Заретэ.
