Ма аллай ат бла бу кюнледе КъМР-ни Маданият фондунда уллу концерт бардырылгъанды. Аны къурагъанла: республиканы Маданият фонду, Шимал  Кавказны искусстволарыны къырал институтуну искусство эм маданият колледжинде преподаватель  Россейни да сыйлы артисти,  Таукенланы Малкъарбийни къызы Галинаны,  СКГИИ-де оркестр инструментле эмда концертмейстер классны тамата преподаватели Анна Заурбековна Хавпачева къурагъандыла. Концерт программада СКГИИ-ни эмда колледжни жыргъа, тепсеуге юйреннген студентле, Нальчикде Жабагъы Казаноко атлы искусствону сабий школунда юйреннгенле да къатыша, жырда, тепсеуде да усталыкъларын кёргюзтгендиле.

 Концерт программада уруш жылланы ким да бек жаратхан жырлары эшитилгендиле. Аны къурагъанла Ата журтну къоруулаучуларына эмда туугъан жерлеринден узакъда  къуллукъларын толтургъанланы хурметине атагъандыла.

Фондну председатели Люаза Макоева,  концерт программаны ача, уруш жылланы жырлары кеслерини магъаналарын бир заманда да тас этмезликлерин, ала тёлюден - тёлюге ётюп баргъанларын чертгенди. «Сёзсюз, «Катюша», «Ол заманлада жигитледен», «Берлиннге жол», «Сен жашайса да, Солдат!», «Сюйген шахарым», «Солдат шахарда барады» деген дагъыда кёп башха жырла тёлюлени къалай къоярыкъдыла бирикдирмей. Бюгюн бу жаш адамла  кёп жылланы мындан алгъа жазылгъан жырланы кёл салып айтырыкъларына ишек жокъду. Олду тёлюлени бирикдирген шагъатлыкъ»,- дегенди  Фондну председатели. Андан сора да, ол «Уллу Ата журт урушну кезиуюнде дуниядан кетген жигитлерибизни атларын биз хурмет бла эсгеребиз эмда  бюгюнлюкде бизни тынчлыкълы жашауубуз ючюн энчи аскер операциягъа къатыша тургъан  аскерчилерибизге махтау сала, ала жууукъ заманда юйлерине сау-саламат къайтырларын тежейбыз», дегенди Люаза Макоева.

Бютюнда уллу хычыуунлукъ а залда олтургъанла жаш артистле бла бирге жырлагъанларында эди. Къараучуланы бла сахнада жаш жырчыланы алай этгенлери дагъыда бир кере жылла тёлюлени бир бирден айырмазлыкъларына шагъатлыкъ этгендиле. Концерт программа да Маданият фондда  патриот иш тынгылы бардырылгъанын, тарых магъаналы шартла сакъланнганларына дагъыда бир кере шагъатлыкъ этгенди.

Холаланы Марзият.