КъМР-ни Башчысы Казбек Коков видеоконференция связь амал бла Россей Федерацияны Къырал советини комиссиясыны «Эл мюлк» бёлюмюню жыйылыууна къатышханды. Аны юсюнден республиканы оноучусуну MAX платформада кесини энчи каналы билдиреди.
Жыйылыуда жерлени къоруулау бла байламлы комплексли планны проектине къаралгъанды, ол санда сюргю эм башха жерлеге желни хатасындан тюшген зараннга, хайырланмай тургъан жерлеге эм кир-кипчикни мардасыз жыйылыууна, табийгъатны сакъларгъа эм аны байлыгъын къыйматлы хайырланыу соруула да сюзюлгендиле.
Башда сагъынылгъан соруула бла байламлы эл мюлкде хайырланнган сюргюледе тереклени сакъларгъа эм ала керекли жерлеге жангыларын орнатыу соруугъа да къаралгъанды. Нек дегенде ол амал мирзеу ёсдюрген сабанланы топуракъларыны мылылыкъларын сакъларгъа эм ол жерлени хауа болумларыны мардада тутаргъа да иги себеплик этеди.
Саулай да бюгюнлюкде Къабарты-Малкъарда эл мюлкде уруннганла жаз башы ишлеге хазырланадыла. Былтыр кюз артында белгиленнген болжалда 55 минг гектарда кюзлюкле, асламысында будай, арпа эм башха битимле да салыннган эдиле. Бюгюнлюкде аланы халлары игиди.
Жылны ичинде бир кезиуге тирлик берген битимлени урлукълары 214,2 гектаргъа себилликди. Аланы асламысын будай, арпа, урлукъ нартюх эм башха битимле аллыкъдыла. Жазлыкъ битимлени урлукъларыны юсюнден айтханда, республикагъа энтта да 6,2 минг тонна керекди. Будай ёсдюрюрге деп алгъадан хазырланнган урлукъ бла республика 97 процентге жалчытылыныпды.
Эсигизге салайым, республикагъа урлукъ берген нартюхню салыр ючюн, жаланда 3,3 минг тонна керекди, ол битим Къабарты-Малкъарда 15 минг тонна чыгъарылады. Башхача айтханда, нартюхню урлугъу бла биз кесибизге керекни къойгъандан сора да, башха регионланы жалчытабыз. Андан сора да, минерал семиртгичлени хазырлау, техниканы сабан ишлеге къурау жумушла да барадыла, заранлы къурт-къумурсхаланы къурутургъа да ырысхыла белгиленнгендиле.
Жылны аллындан бери мюлкле 34 жангы трактор мажаргъандыла. Эл мюлк битимлени буздан сакъларгъа республикалы бюджетден 40 миллион сом бёлюнюрюкдю. Жаз башы сабан ишлеге хазырланыу белгиленнген кезиуде бардырылады. Бир кесекден кюзлюк битимлени семиртгичле бла байыкъландырлыкъдыла. Кюнню халы тюзелсе, жууукъ кезиуде сабанчыла ишге кириширикдиле, деп айтылады билдириуде.
