КъБР-м и Iэтащхьэ КIуэкIуэ Казбек и унафэм щIэту екIуэ­кIащ Террорым пэщIэтынымкIэ комиссэм и зэIущIэ зыубгъуа.

Зэхуэсым хэтащ КъБР-м и Парламентым и УнафэщI Егоровэ Татьянэ, Правительствэм и УнафэщI Мусуков Алий, УФ-м и Президентым и полномочнэ лIыкIуэу КИФЩI-м щыIэм и Аппаратым КъБР-м къегъэ­щIылIа и федеральнэ инспектор Васильченкэ Дмит­рий, муниципальнэ зэгухьэныгъэхэм я администрацэхэм я Iэтащхьэ­хэр, щIыналъэм щыIэ хабзэ­­хъумэ органхэм я уна­фэщIхэр.
Нэхъыщхьэу зи гугъу ящIар транспортымрэ абы пыщIа   IэнатIэхэмрэ террористическэ шы­нагъуэншагъэр къыщызэгъэпэщынырщ. Апхуэдэуи егъэ­­­­джэныгъэ IэнатIэми   абы и лъэныкъуэкIэ лэжьыгъэр  нэх­ъ­ри набдзэгубдзап­лъэу ще­гъэ­кIуэкIынми тепсэ­лъы­хьащ. Псом хуэмыдэу гулъы­тэшхуэ хуащIащ хамэ къэралхэм щыщ террорист ­зэгухьэныгъэхэм ­зыхашэнкIэ ­хъуну шэч уэзыгъэщIхэр абы­хэм я хъым имыхуэн папщIэ щхьэхуэу ядэ­лэжьэн зэры­хуейм. Мыхьэ­нэш­хуэ зиIэ Iуэхуу къалъытэу къытеу­вы­Iащ дзэ Iуэху хэхар щекIуэкI щIыпIэхэм кърашыжа сабийхэм ядэлэжьэным, абы­хэм    хабзэм ебакъуэ къахэмы- ­кIын хуэдэу, нэхъ хэхауэ я нэIэм щIэгъэтыным.
КъимыдэкIэ, комиссэм хэтхэм зэпалъытыжащ террориз­мэм пэщIэтынымкIэ мыхьэ­нэшхуэ зиIэ Iуэхухэу республикэм и жылагъуэ-политикэ, социально-экономикэ IэнатIэхэм щызэфIагъэкIхэр. Ахэр и лъабжьэу къыхалъхьа чэнджэщхэр щытыкIэр зэпIэзэрыту щы­тыным, шынагъуэ гуэр къы­къуэкI хъужыкъуэмэ, и чэзум абы жэуап етыжыным къыхуа­гъэсэбэпынущ.