Мектепледе окъугъанланы араларында  усталыкъ сайлау бла байламлы юйретиу ишге  бюгюнлюкде уллу магъана бериледи. Ол иш школчугъа усталыкъ сайларгъа болушуу бла чекленип къалмай,  аны  сейирлерин, хунерлигин билирге,  къайда хайыр келтирирге боллугъун ангыларгъа да онг береди. Акъ-Сууда 15-чи номерли мектепни оноучулары, устазлары да, аны дурус ангылап, ол жаны бла тюрлю-тюрлю мадарла этедиле. Ма бу кюнледе да 8-чи классны окъуучулары устазлары Тохаланы Ариужан бла  Нальчикде женгил  промышленность колледжге баргъандыла эмда  анда  къаллай усталыкълагъа юйретгенлери бла шагъырейленнгендиле.

Эсге сала айтсакъ, усталыкъ сайлауну магъанасы керти окъуна бек уллуду. Аны себепли адам  аны юсюнден биринчи паспортун  алгъынчы окъуна сагъыш этип башласа иги болур. Сёзсюз, ол тынч сайлау тюйюлдю. 13-17-жыллыгъында акъылбалыкъ болмагъан жаш, къыз да: «Мен ким болургъа сюеме, къаллай усталыкъ сайларгъа ыразыма?» - деген сорууну береди. Болсада асламында ол сайлау эсде да болмай тургъанлай этиледи. Анга себепликни ата-анала, шуёхла неда интернетде кюн сайын айтылып тургъан  модалы усталыкъла этедиле.   ВЦИОМ-ну тинтиулери ачыкълагъаннга кёре,  вузланы бошап чыкъгъан жаш адамланы къыркъ проценти алгъан усталыкъларына кёре ишлемейдиле, хар ючюнчю студент а  биринчи курсдан сора башха усталыкъ жаны бла окъургъа   кёчеди.

Холаланы Марзият.