Жаболаны Мурадинни жашы Альберт энчи аскер операциягъа къатышхан жигитлерибизден бириди. Биз аны бла ол СВО-дан юйюне солургъа къайтхан кезиуде тюбеп, ушакъ этген эдик.
- Альберт, энчи аскер операциягъа кетгинчи не бла кюрешгенинги айтсанг эдинг?
- Мен Къара-Сууда туугъанма. Анда школну бошап, 2006 жылда Къабарты-Малкъар къырал университетни Филология институтуна киргенме. Аны бла чекленип да къалмай, Синергия университетни Москвадагъы филиалында юриспруденция жаны бла окъугъанма.
Алай а гитчелигимден да аскер къуллукъгъа жюрегим бек тартханды. Ол себепден 2013 жылны август айында Нальчик шахарда келишимге къол салып, Росгвардияны Къабарты-Малкъарда управлениясында къуллукъ этип башлагъанма. Техниканы жаууна, отлугъуна къарап, аны бла тынгылы жалчытыу ючюн жууаплы болгъанма.
- Эртте юйюрлю болгъанынгы да билеме.
- Жыйырма бир жылым толгъанда, Отарланы Аминни къызы Лейла бла бир юйюр къурагъанбыз. Бюгюнлюкде юч сабий ёсдюребиз. Гитчебиз Алия сабий садха жюрюйдю, таматаларыбыз Алан бла Альфия уа школда окъуйдула.
- Энди энчи аскер операциягъа кёчейик.
- СВО башланнганлы аны кёп жерлеринде болгъанма. 2023 жылдан бери жети кере командировкагъа баргъанма. Биринчи кере Херсон областьда, артда - Геническ шахарда. Къырымда Джанкойгъа да бир баргъанма, андан тышында, Запорожье областьны Токъмакъ шахарында болгъанма.
Ахыр командировкам юч айгъа созулгъанды. 2025 жылда сентябрь айда ары тебиреп, Донецк Халкъ Республиканы Мариуполь шахарында юч ай туруп, январьны 16-да артха, юйюме, жериме, къайтханма.
- Белгилисича, аскерде кёп къуллукъла бардыла, сени ишинг а не бла байламлыды?
- Ары биз къуралгъан бригадала бла барабыз. Кёбюсюнде техниканы ремонту бла кюрешебиз. Машиналаны бузукъларына къарап, тинтип, къагъытха жазабыз, анга кёре ремонтун башлайбыз. Таматаларыбыз берген буйрукъну тийишлисича толтурургъа кюрешебиз. Сёз ючюн, жолда бара тургъанлай, машина бузулса, аны тартып келирге да ол тукъум техникабыз да барды. Онгларыбыз кёпдюле. Къыйын болгъанлыкъгъа, сюйюп ишлейме.
- Жаш тёлюге айтырыгъынг а бармыды?
- Къыралыбызны къыйын заманыды: энчи аскер операция барады, битеу дуния бизге къажау тургъанчады. Тыш къыралланы бир-бирлери бизни къуршаларгъа кюрешип, къыйнар эмда апчытыр ючюн не уллу аманлыкъладан да артха турмайдыла. Алай бизни жюреклерибизде Ата журтубуз не заманда да биринчи жерде болургъа керекди. Мени оюмум алайды, жаш тёлюге да айтырыгъым олду.
- Сау бол ушагъынг ючюн. жашау жолунгда, къыйын ишингде да жетишимлеринг кёп болсунла. Биз сизнича жашларыбыз бла ёхтемленебиз!
Ушакъны Додуланы
Мадина бардыргъанды.
