Бу кюнледе Малкъар халкъны кёчгюнчюлюкде азап чекген эмда ёлген адамларыны хурметине ишленнген мемориалда «Юнармия» битеуроссей сабий-жаш тёлю аскер-патриот жамауат биригиуню регион бёлюмюню ишине тири къатышханланы белгилегендиле.

Анга аталгъан къууанчлы жыйылыу, тёреде болгъаныча, Россейни бла Къабарты-Малкъарны къырал байракъларын чыгъарыудан эмда гимнлеринден башланнганды. Андан ары келгенле бир минут шош туруу бла Уллу Ата журт урушда ёлгенлеге сый бергендиле.

 Къонакъланы алгъышлай, мемориалны директору Теммоланы Фаризат бу жумуш «Ата журтну къоруулау - аллай усталыкъ барды» деген проектни чеклеринде бардырылгъанын билдиргенди.

-Бюгюн Уллу Хорламны 80-жыллыгъына аталгъан ишлеге тири къатышхан сабийлени бла аланы ёсюп келген тёлюню юйретиуге уллу къыйын салгъан насийхатчыларын белгилейбиз, - деп, тюбешиуню жарыкъ халда бардыргъанды.

Саугъалагъанланы араларында уа «Къабарты-Малкъар Республиканы тийресинде сабийлерибизни саулукълары бла  къоркъуусузлукълары ючюн» деген  проектни жарашдыргъан, КъМР-де МВД-ны  Наркоконтролюню эм магъаналы борчланы толтуруу жаны бла оперуполномоченныйи, полицияны подполковниги Ирина Давыдова, КъМР-ни Жамауат палатасыны келечиси, аскер къаугъаланы ветераны, Кишиликни орденини кавалери Владимир Абаноков, КъМР-ни Муслийманларыны дин управлениясыны (ДУМ) башчысыны орунбасарлары Мисирланы Хызыр бла Алим Сижажев, Пятигорскну бла Черкесскни епархиясыны Нальчик округда благочинныйини жаш телю бла ишлеу жаны бла болушлукъчусу Ирина Артунова, «Юнармия» битеуроссей сабий-жаш тёлю аскер-патриот къымылдауну регион бёлюмюню штабыны таматасы Тембулат Гятов бар эдиле.

Алай бла, Нальчик шахарны 6-чы номерли школу, Республикалы кёп профильли гимназия, «Уллу Хорламны 80-жыллыгъына аталгъан ишлеге тири къатышханлары ючюн» номинацияда сыйлы грамоталагъа тийишли болгъандыла. «Юнармия жигитлик» белги бла аскер къазауатланы ветераны, подполковник Виталий Комардин бла «Юнармияны» Нальчикде штабыны башчысы, запасдагъы лейтенант Трамланы Хамзат Яникой элни орта школуну окъуучуларын Гемуланы Исмайылны, Насталаны Арсенни, Аппайланы Залинаны эм Нальчикни 2-чи лицейини келечиси Трамланы Ясминаны тириликлери ючюн уа 3-чю даражалы белги бла саугъалагъандыла.

Дагъыда Теммоланы Фаризат бери келген тамата тёлюню сабийлени юйретиуде салгъан къыйынларын белгилей, ыспас къагъытланы бергенди. Сыйлы къонакъланы бир бирлерине уа ёсюп келген тёлюню юйретиуде Россейни тёрели тин хазнасын сакълаугъа эмда байыкъландырыугъа къыйын салгъанлары ючюн мемориалны грамотасы бла саугъалагъанды.

«Рирада» вокал студияны сохталары уа, жыйылыу баргъан къадарда, бир ненча кере сахнагъа чыгъып, кеслерини жарыкъ аууазлары бла жюреклени жарыта, къарслагъа ие болгъандыла.

Сёз «Юнармия» битеуроссей сабий-жаш тёлю аскер-патриотлукъ жамауат къымылдауну регион бёлюмюню штабыны таматасы Тембулат Гятовха берилгенде, ол жаш аскерчилеге насийхат сёзлерин айтханды: «Кесигизни айнытыгъыз, не сюйгенигизни ангыларгъа кюрешигиз, бюгюнлюкде бизни къырал болмагъанча кёп онгла тапдырады».

Аны ызындан сёз КъМР-ни Муслийманларыны дин управлениясыны башчысыны биринчи орунбасары Мисирланы Хызирге берилгенди.

- Къаллай бир фахмулу сабийлерибиз бардыла! Ала бизни бирикген кёп миллетли уллу къыралыбызны кюзгюсюдюле. Къайда болсагъыз да, республикабызгъа, къыралыбызгъа да махтау келтирлигигизге ийнанама, - дегенди къадий.

ДУМ-ну башчысыны орунбасары Алим Сижажев бу ишге быллай уллу эс бургъаны ючюн Теммоланы Фаризатха ыразылыгъын билдиргенди.

- Кертисин айтханда, Ата журтну сюе эсенг, иги окъугъанынг бла анга хайырлы болургъа эмда хата салмазгъа кюрешсенг, ол да патриотлукъну бир шартыды, - дегенди.

Патриот байрам «Къабарты-Малкъар» деген жарыкъ жыр бла бошалгъанды.

Лайпанланы Мадина.