КъМР-ни Башчысы Казбек Коков бу кюнледе республиканы жетишимли спортчулары бла тюбешгенди. Нальчикде «Гладиатор» комплексде бардырылгъан жыйылыугъа къырал къуллукъчула, тренерле, тийишли спорт федерацияланы келечилери эм башхала къатышхандыла.
Казбек Коков, биринчиден, быйыл жетишимле болдургъан, республиканы, къыралыбызны атларын игилик бла айтдыргъан спортчулагъа ыспас этгенди. Ызы бла миллет проектлени хайырындан бу сферада кёп зат тындырыргъа къолдан келгенин, келир жыллада да аслам иш этиллигин билдиргенди, кемчиликлени юслеринден да ачыкъ айтыргъа чакъыргъанды.
Женгил атлетикада битеу дуниягъа белгили Мария Ласицкене Прохладныйде жангы спорт комплекс ишлене тургъанына бек ыразы болгъанын айтханды. Ол объект хазыр болса, районда спорт бютюн терк айнырыгъына ышаннганын да чертгенди. Дагъыда спорт бла кюрешген сабийлени тыш регионлагъа ташыгъан автобус эски болгъанын билдирип, бу жаны бла бир мадар этилирин тилегенди. Республиканы Башчысы уа аны узакъгъа созмай тындырыргъа сёз бергенди.
Пекинде Олимпиаданы эркин тутушуудан чемпиону Асланбек Хуштов бир-бир къоншу республикалада, ол санда Шимал Осетияда бла Дагъыстанда, спортха бизден эсе бир ненча кереге кёп ахча къоратханларын айтханды. «Алай чемпионланы эмда призёрланы саны бла уа биз алда тюйюл эсек, аладан чыртда артха къалмайбыз. Сёз ючюн, эркин тутушуудан бизни республика бек бийик жерни алады. Регион властьланы жанындан себеплик этиу а аладан эсе осалды», - деп къошханды ол.
Соруула бергенлени бир кесеги тренерлени айлыкъ хакълары аз болгъаныны, аны ёлчеми сохталарыны жетишимлерине келишмегенини юсюнден да жарсып билдиргендиле. Спортха медицина жаны себеплик этиу бек осал болгъанын белгилеп, аны айнытыргъа кереклисин а жыйылгъанланы бары да бирча дурус кёргендиле.
Сёз спортчуланы эришиуледен сора аягъы юсюне салыу жаны бла онгланы, специалистлени да юслеринден барады. Республикада аны бла тийишли диспансер кюрешеди дерге да боллукъду, алай, айтханларына кёре, анда иш иги къуралмагъанды.
- Башында сагъынылгъан эки республикада тыш регионлада эришиулеге спортчула бла бирге врачла да барадыла. Массажистлени, башха специалистлени айтмай да къояйыкъ. Бизникиле уа не заманда да жалан кеслери, - дегенди тренерледен бири.
Парламентни Председателини орунбасары Мурат Карданов, айтылгъанны тюзге санап, бюгюнлюкде республикада спорт медицина жокъну орунунда болгъанына женгдиргенди. Алай быйыл бу жаны бла тийишли мадар этилип башланнганын да эсгертгенди. Сагъынылгъан диспансерни мурдорунда, медиклени да къошуп, ишни тынгылы къураргъа боллукъду деп, ол анга артыкъ уллу къоранчла керек болмагъанларын да айтханды.
Правительствону Председатели Мусукланы Алий, ушакъгъа къошула, быйыл биринчи он айны ичинде бу сферагъа республиканы бюджетинде белгиленнген къоранчланы 3,3 проценти бёлюннгенин билдиргенди. Ол а 1,3 миллиард сом болады. Сёз ючюн, саулай Шимал Кавказда бизни республика бу жаны бла биринчи жерни алады, Россей Федерацияда уа – онбиринчини. Юлгюге былтыр Къабарты-Малкъар тёртюнчю эм 28-чи жерледе эди. Келир жылда тийишли къоранчланы ёлчеми энтта да он процентге кёбейирикди, деп ышандыргъанды Мусук улу.
Тюбешиуде дагъыда регби ойнаучулагъа майданны, боксчулагъа залны, къаялагъа ёрлеу бла кюрешгенлеге инфраструктураны игилендирирге кереклисини, тренерлени усталыкъларын ёсдюрюуню юсюнден да сёлешгендиле. Казбек Коков битеу айтылгъаннга тынгылы эс буруллугъун белгилегенди, къолдан келгенича себеплик этерге айтханды. «Спорт бёлюмде аз кемчилик жокъду, аланы барын да тюзюнлей ма бюгюн болмаса да, бек узакъгъа созмай кетерирге уа къолубуздан келликди», - деп чертгенди ол. Республиканы оноучусу, жыйылгъанланы келир Жангы жыл бла алгъышлап, саулукъ, насып, бийик жетишимле тежегенди.
