Нальчикде КъМР-ни сабий эм жаш тёлю къаласында Ата журтну къоруулаучусуну кюнюне жораланнган уллу концерт программа кёргюзтюлгенди. Байрамгъа жораланып  бардырылгъан къууанчлы  ишни къонакъла: КъМР-ни Парламентини билим бериу, илму, физкультура, спорт, жаш тёлюню ишлери, культура, информация политиканы эмда граждан обществону айнытыу жаны бла комитетини къауумуна кирген, Къабарты-Малкъарда  «Артха бир атлам да этмезге» Ата журтлуларыбызгъа себеплик этиу жаны бла волонтёрлукъ къымылдауну регион жамауат организациясыны толтуруучу директору   Байсыланы Темиржан, энчи аскер операциягъа къатышып къайтхан ветеран  «КъМР-ни жигитлери» деген регион программагъа къатышхан Жашууланы Аслан да ачхандыла.

Ата журтну къоруулаучусуну кюню бла  залда олтургъанланы, къонакъланы, сабийлени, жаш адамланы да  Чыгъармачылыкъ юйню директору, КъМР-де Орус география обществону бёлюмюню директору Аксана Курашева  алгъышлагъанды.

Къалагъа келип окъугъан, юйреннген жашла бла къызла эмда аланы юйретип ишлегенле да,  акциягъа къатышып, «Артха бир атлам да угъай» деген волонтёр къымылдаугъа энчи аскер операциягъа къатыша тургъан аскерчилеге деп, жыйышдыргъан гуманитар болушлукъларын бергендиле.

 Къалада болгъан чыгъармачы коллективле эмда жаш жырчыла жарыкъ концерт программалары бла залда олтургъанланы къууандыргъандыла. Аланы жырларындан, тепсеулеринден залда патриотлукъ сезим кесине уллу жер тапханды. Битеу кёллерин, жюреклерин, фахмуларын да салып кёргюзтген тепсеуле, жырла уа байрамны унутулмазча этгендиле.

Холаланы Марзият.