Къэбэрдей-Балъкъэрым и Iэтащхьэ КIуэкIуэ Казбек «Гладиатор» спорт комплекс зэхэтым щыIущIащ ди республикэм и спортсмен, гъэсакIуэ па­жэхэм.

Къызэхуэсахэм я пащхьэ къы­щыщыпсалъэм, КъБР-м и УнафэщIым къыхигъэщхьэхукIащ зэхыхьэм кърихьэ­лIа псоми ди щIыналъэм спортым зыщегъэужьыным хэлъхьэ­ны­гъэш­хуэ зэры­хуащIар, ­къыжиIащ Къэбэрдей­-Балъ­къэрым, зэрыщыту къат­щтэмэ, ди къэра­лым я пщIэр къэIэтыным ахэр зэ­рыхуэлажьэр.
- Нобэрей зэIущIэм кърихьэлIахэми, щхьэу­сыгъуэ зэхуэмыдэхэм къахэкIыу къэ­мыкIуэфахэми яхуэгъэзауэ къыхэдгъэщыну дызы­хуейр аращи, фэ фащыщщ, щхьэх жыхуаIэр зы­мыщIэу, зы­пэрыт IэнатIэр псэемыблэжу езыхьэкIхэм. КъытщIэхъуэ щIэблэм ­дежкIэ щапхъэгъэлъагъуэу фы­диIэщи, фэ вбгъэдэлъщ ди къэралри республикэри япэкIэ зыгъэкIуэтэфын, щIалэгъуалэр псэукIэ дахэм, узыншэм дезыгъэ­хьэ­хыфын, фIым хуэзыу­нэ­тIыфын къаруушхуэ. ФIы­щIэ фхудощI, ди ныбжьыщIэхэр зэщIэкъуарэ захуагъэ зыхэлъу щытынымкIэ гъэсэныгъэ тэмэм зэ­ревгъэкIуэкIым папщIэ.
КъехьэкI-нехьэкI хэ­мы­лъу, я гупсысэхэр хуиту зэжраIэу щызэпсалъэм, гъэсакIуэ пажэхэм я гугъу ящIащ Къэбэрдей-Балъкъэрым спортым зыщегъэужьынымкIэ нэхъ мы­хьэнэ ин дыдэ зиIэ Iуэхухэм. Абыхэм ящыщщ спортым  и лэжьакIуэхэм ахъшэкIэ нэхъ зэрызащIэгъэкъуапхъэр, тренерхэм я улахуэм хэгъэхъуэн зэры­хуейр, нэгъуэщI хэгъэгухэм къы­щызэрагъэпэщ зэхьэзэхуэхэм ягъакIуэ ди спорт­сменхэм трагъэкIуадэ мылъкум зэрыхэгъэхъуапхъэр, нэгъуэщIхэри.
Къызэхуэсахэм ап­хуэдэуи къыхагъэщащ ныкъуэды­къуэхэр спорт IуэхущIапIэхэм нэхъ тыншу кIуэныр къызэгъэ­пэ­щы­ным, олимп зэпеуэхэм хэмыхьэ спорт лIэужьы­гъуэхэм ди республикэм зыщегъэужьыным, спорт­сменхэм я узыншагъэр зэрызэфIагъэувэж про­граммэхэр зэ­хэлъ­хьэ­ным ди щIыналъэм нэхъ щегугъун зэрыхуейри.
КIуэкIуэ Казбек къыхигъэщхьэхукIащ зэIу­щIэм къыщаIэта Iуэху псори зэ­ры­зэ­фIагъэкIыну Iэмалхэм зэрылъыхъуэнур. Абы къы­зэхуэсахэм яжриIащ мып­хуэдэ зэIущIэхэр щIэх-щIэ­хыурэ зэхашэн зэры­хуейри. Спорт жылагъуэм и лIы­кIуэ­хэм КъБР-м и ­Iэтащхьэм фIыщIэ хуа­щIащ, а IэнатIэм ди республикэм зыщегъэу­жьы­ным и нэIэ зэры­т­ригъэтым къы­хэкIыу.
ЗэIущIэм хэтащ республикэм и Пра­вительствэм и УнафэщI Мусуков Алий, ­КъБР-м и Парламентым и УнафэщIым и къуэдзэ ­Къардэн Мурат, Физическэ щэнхабзэм, спортым, ту­риз­мэм и лэжьакIуэхэм я Къэбэрдей-Балъкъэр щIыналъэ профсоюзым и Iэтащхьэ Заруцкий Александр сымэ, нэгъуэщIхэри.