КъМР-ни школчулары бла «Сабийлерибизни саулукълары эм къоркъуусузлукълары ючюн» ангылатыу жумушла бардырыладыла. Наркотиклени жайылыууна къажау жыйылыулагъа 11 мингден аслам окъуучу бла аланы ата-аналары къатышхандыла. Анга къошулгъан жамауат организацияла бла белгили артистле, спортчула да кёпден-кёп боладыла. 

Бу жол а аллай тюбешиу Нальчикни 7-чи номерли школунда бардырылгъанды. Жаш адамланы аллында право низамны сакълаучула, жууаплы органланы келечилери сёлешгендиле. Ала наркотик адамны санларына салгъан хатаны, аны законсуз сатыу-алыу бла кюрешгенле къаллай жууапха тартылгъанларыны, къыралны законларын сакъларгъа кереклисини юслеринден айтхандыла. 
Тюбешиуге КъМР-ни Муслийманларыны дин управлениясыны башчысыны орунбасары Алим Сижажев, Нальчикни килисаларыны благочинныйини болушлукъчусу  Ирина Артунова да къатышхандыла.  Дагъыда жаш адамланы бла аланы ата-аналарыны аллында режиссёр, Максим Горький атлы Орус къырал драма театрны артисти Мызыланы Аубекир бла Россейни эм дунияны каратеден чемпиону Алан Макоев да сёлешгендиле.
Жаш адамла ушакъгъа тири къатышхандыла, ала наркотиклени хатасыны юсюнден кеслерини оюмларын айтхандыла, къонакълагъа соруула бергендиле. Акцияны ниетлерин тюзге санап, ала «Нет наркотикам!» деген белги бла суратха тюшгендиле. Алай бла саулукълу жашауну сайлагъанларын билдиргендиле.