КъБР-м и Музыкэ къэрал театрым мазаем и 21-м концерт щитащ УФ-м и цIыхубэ артист, Мариинскэ театрымрэ Театр Инымрэ я унафэщI, УФ-м и Президентым щэнхаб­зэмрэ гъуазджэмкIэ дэлажьэ Советым хэт Гергиев Валерий зи пашэ Урысей лъэпкъ щIалэгъуалэ симфоние оркестрым. Ар къы­­зэрагъэпэщащ СССР-м, РСФСР-м, ­КъБР-м я цIыхубэ артист, Совет Союзымрэ Урысей Федерацэмрэ я къэрал саугъэтхэм я лауреат, Санкт-Петербург щIыхь зиIэ и цIыху, а къалэм и филармонием и Акаде­мическэ симфоние оркестрым и художественнэ унафэщIу щыта дирижёр цIэрыIуэ Темыркъан Юрэ и фэеплъу.

Оркестрым игъэзэщIащ совет, урыс композитор цIэрыIуэ, нэгъабэ дунейм ехыжа­ ­Щедрин Родион и лэжьыгъэхэр. Фортепианэ ­еуащ Гергиев Валерий и къуэ, пианист IэкIуэ­лъа­кIуэ, Урысейми хамэ къэралхэми къыщацIыхуа, дунейпсо зэпеуэхэм я лауреат Гергиев Абисал.
- Лъэпкъ щIалэгъуалэ урыс симфоние ор­кест­рым и гъусэу куэд щIауэ зыкъыдогъэлъагъуэ. Иджырей концертыр фи хэкуэгъу цIэ­рыIуэ Темыркъан Юрэ и фэеплъу къызэдгъэ­пэ­щащ. Консерваториер къэзуха къудейуэ, сыщIалэ дыдэу, уеблэмэ иджыри IэщIагъэм сыхэзэгъэну сыхунэмысауэ, Темыркъаным и ассистенту сригъэблэгъауэ щытащ Ленинград и Кировскэ театр цIэрыIуэм. Темыркъан Юрэ къысхуищIахэр зэи сщыгъупщэнукъым, - жиIащ Гергиев Валерий. - Республикэм и Iэтащхьэ КIуэкIуэ Казбек и гъусэу дытопсэлъыхь дирижёр цIэрыIуэм и фэеплъ пшыхьхэр Санкт-Петербурги Налшыки къызэрыщызэдгъэпэщынум. КъБР-м и япэ Президент КIуэкIуэ Валерэ си ныбжьэгъуу зэрыщытари си гуапэу къыхэзгъэщынут. Владикавказ къы­щыхъуа сэ сощIэ лъэпкъхэм ди зэкъуэтыныгъэр зэрылъапIэр. Ар щэнхабзэ IуэхухэмкIэ нэхъ­ри щIэдгъэбыдэным тетщIыхьу, Мариинс­кэ театрым и артистхэри мыгувэу Налшык к­ъэтшэну ди мурадщ. 
- Урысей лъэпкъ щIалэгъуалэ симфоние ор­кестрым и артистхэм фIэхъус гуапэ фызох!  Къэбэрдей-Балъкъэрым и щэнхабзэм и тхы­дэм къыхэнэн Iуэху зэрывлэжьам  папщIэ фIыщIэ фхуэфащэщ. Бы­дэу си фIэщ мэхъу мы пшыхьым щIыналъэм и зыужьыныгъэр, щэнхабзэ гъащIэр зэрыригъэфIэкIуэнур. Фи зэфIэкIыр инщ, ди къэралым и мызакъуэу, дуней псом щэнхабзэ лъагэр тыгъэ хувощI.ТхакIуэ цIэрыIуэм зэрыжиIауэ: «Дахагъэм дунейр къригъэлынущ». Си фIэщ мэхъу абы зи гугъу ищIар мы дахагъэ иным зэрыхуэдэр. Ар дуней псом щывогъэлъагъуэ. Ди щхьэр фхудогъэщхъ ди хэ­куэгъу лъапIэм теухуауэ фи гум щыфхъумэ фэеплъым папщIэ. Ар иджыри зэ щыхьэт тохъуэ нэхъыжьхэм пщIэ зэрахуэфщIым, фи зэхуаку дэлъа зэхущытыкIэ, зэныбжьэгъугъэ гуапэм. Си щхьэкIэ сэркIэ лъапIэщ сынывэ­п­сэлъэну къыщысхуихуэ дакъикъэр, си лэжьыгъэми си гъащIэми къыщысхуэщхьэпэ куэд абы къыхызохри. Уи щIалэм и IэщIагъэ хуэхъу­нум узэрыкIэлъыплъари щхьэхуэу къыхэзмыгъэщу схуэшэчынукъым. Щэнхабзэм къы­щIэувэ щIэблэм я зэфIэкIыр къызэрызэкъуа­хым иджыри илъэс куэдкIэ укIэлъыплъыну ­Iэмал уиIэну, уи IэщIагъэм зэрыпащэм гу­­къы­дэж къуиту, ехъулIэныгъэхэр уиIэу упсэуну сынохъуэхъу!
КIуэкIуэ Казбек а махуэм Iэ щIидзащ Гер­гиев Абисал «КъБР-м щIыхь зиIэ и артист» цIэ лъапIэр зэрыфIащым теухуа унафэм, щэнхабзэмрэ гъуазджэмрэ я зыужьыныгъэм хуищI хэлъхьэныгъэ инхэм папщIэ.
Гергиев Валерий журналистхэм зыкъыщытхуигъэзам къыджиIащ Налшык куэд щIауэ зэрыщымыIам къыхэкIыу къызэрытхуэзэшар, дирижёр цIэрыIуэ, япэщIыкIэ езыгъэджа, иужь­кIэ и лэжьэгъу, и ныбжьэгъу хъуа, илъэситIрэ ныкъуэм щIигъуауэ къытхэмытыж Те­мыркъан Юрэ и фэеплъ концертыр гукъинэж ящыхъуну зэрыщыгугъыр. Абы жиIащ Кавказым щIэх-щIэхыурэ зэрызыкъыщагъэлъагъуэр, Темыркъан Юрэ и лэжьыгъэхэр, псом хуэмыдэу и спектаклхэр ягу къагъэкIыж къудей мыхъуу, зэрахъумэр, щIэблэм я деж зэрынахьэсыр. Гергиевым къыхигъэщащ ди Музыкэ театрыр дуней псом щыщыIэ мардэхэм тетын зэрыхуейр. Гу лъаригъэтащ ап­хуэ­дэ лэжьыгъэшхуэ Владикавказ зэрыщ­рагъэ­кIуэкIар, XIX лIэщIыгъуэм и тхыдэ ухуэныгъэхэр къызэрыщагъэщIэрэщIэжар. Владикавкази Налшыки Кавказым и фестиваль инхэр щрагъэкIуэкI къалэ хъун, макъамэмрэ гъуазджэмрэ дахьэххэм дуней псом щы­цIэ­рыIуэ музыкантхэм я лэжьыгъэхэр зэхахын ­хуейуэ къызэрилъытэр жиIащ. И мурадхэм ящыщу къыхигъэщащ Мариинскэ театрымрэ Театр Инымрэ я артистхэмрэ республикэм и артистхэмрэ зэдигъэлэжьэну зэрыхьэзырыр, оперэхэр, балетхэр зэдагъэув, камернэ концертхэр зэгъусэу ят зэрыхъунур. 

ТЕКIУЖЬ Заретэ.
Сурэтыр
Къарей Элинэ трихащ.