Налшык дэт «Сигу ирохь» студием щагъэлъагъуэ су­рэтыщI, егъэджакIуэ, зып­лъы­хьакIуэ Мотылевэ Марие и лэжьыгъэхэр.

МГУ-м ПечатымкIэ и факультетыр, иужькIэ «Иллюстрация и комиксы», «Современное искусство» унэтIыныгъэхэм Лиссабон ГъуазджэхэмкIэ и школыр къыщызыуха Марие куэ­дым и зэфIэкI щоплъыж икIи и лэжьыгъэхэр щыхьэт тохъуэ зызрипщыт Iуэхухэр къызэрехъулIэм. Апхуэдэщ, щэкIым, хэ­дыкIым, сурэт щIыным, графикэм, гравюрэм, комиксым щыщу утыку кърихьа и Iэдакъэ­щIэкIхэр. И сурэтхэм куэду къы­щигъэлъэгъуащ мэз псэущхьэхэмрэ тенджызыр зи хэщIапIэ бдзэжьей лIэужьы­гъуэхэмрэ. Гъэлъэгъуэныгъэм хигъэхьащ щэкIым къыхи­щIыкIа и пкIэлъейр, 2022 гъэм Лиссабон щищIа гравюрэхэм щыщ.
Москварэ Мейкъуапэрэ къы­щыхъуа сурэтыщIым и IэдакъэщIэкIхэр триухуащ и сабиигъуэм и нэгу щIэкIа гукъэ­кIыжхэм, къызыхэкIам къуэпс быдэкIэ пыщIэныгъэ зэрыхуи­Iэм, тхыдэм, хьэщIагъэ зэры­зэрахьэ хабзэм, гъащIэм зыщрихьэлIэ Iуэхухэм, нэгъуэщIхэми. Марие и лэжьыгъэхэр щагъэлъэгъуащ Сауд Хьэрыпым, Португалием, Швейцарием, Гаванэ, Москва щыIэ музейхэмрэ гъуазджэхэмкIэ галереехэмрэ. 
Мотылевэ Марие и дерсхэмрэ мастер-классхэмрэ къекIуалIэ дизайнерхэр, иллюстраторхэр, сурэтыщIхэр хурегъаджэ Франджым, Японием, Америкэм и Штат Зэгуэтхэм щIэупщIэ ин щызиIэ комикс жанрымрэ графикэм и тхыдэмрэ, иджырей хэдыкIым, мультипликацэм. ЩI­алэгъуалэр абы щегъэгъуа­зэ пасэрей IэщIагъэмрэ иджы­рей гъуазджэмрэ зыхэбухуанэ зэрыхъум.
Гъэлъэгъуэныгъэм зыкъре­зы­гъэхьэлIахэм жаIащ Марие и лэжьыгъэхэр щIэщыгъуэ зэращыхъуар, и хэдыкIхэм тхыдэм и кIапэлъапэхэр, цIыху­хэм яхуи­Iуэтэну зыхуейхэр, уеб­лэмэ худо­жественнэ тхыгъэхэр пса­лъэ­кIэ мыхъуу а IэмалымкIэ къы­зэригъэлъагъуэр, гъуазджэм гъуни нэзи зэримыIэм ахэр иджыри зэ щыхьэт зэрытехъуэр. 
Студиер зыгъэлажьэ Хьэ­цIыкIу Миланэ, хабзэ зэры­хъуауэ, къызэхуэсахэм яж­риIащ гъэ­лъэгъуэныгъэр ще­кIуэкI махуэхэм мы IуэхущIапIэм гупыж зыщI дэтхэнэми сурэт щызытрагъэхыну Iэмал зэраIэр.

Сурэтхэр Къарей Элинэ трихащ.

Бжьыхьэ Розэ.