КъМР-ни Башчысы Казбек Коков Къабарты-Малкъаргъа иш бла келген «Юнармия» къымылдауну баш штабыны таматасы Россейни Жигити Владислав Головин эмда «Биринчилени атламларыны» правленини председателини орунбасары Ксения Янова бла тюбешгенини юсюнден айтылады регионну оноучусуну МАХ платформада каналында.
Ала сабийлени бла жаш тёлюню граждан, патриот, тин-адеп жаны бла юйретиу сорууланы, жамауат организацияланы болумларын, ишлерин сюзгендиле.
«Биринчилени атламларыны» регион бёлюмю юч жыл мындан алда къуралгъанды. Бусагъатда бизде 297 первичный бёлюм барды, ала 86 минг сабийни бла абаданны бирикдиредиле. Биздеги «Биринчилени атламлары» уллу иш бардырады, муниципалитетле бла байламлыкъ жюрютеди, аслам сейир эм хайырлы проектни жашаугъа кийиреди. Эм магъаналы ызладан бири насийхатчылыкъды. Ол профилактика эсепде тургъан ёксюз сабийле эмда акъылбалыкъ энди бола келгенле бла ишде бек магъаналыды. «Магъанасы уллу болгъан абадан адам», «Биринчилени насийхатчыларыны клубу», «22.00. Сизни сабийлеригиз юйдемидиле?» проектле бардырыладыла.
Къымылдау саулукъну кючлеген жай кампаниягъа къатышады, былтыр «Биринчилени вожатый командалары» проект башланнганды. «Биринчилени атламларыны» сатырларына саулукъларында чекленнген онглары болгъан сабийле да къошуладыла, «Биринчилени китап клублары», «Чексиз къымылдау» дегенча проектле бардыла. «Тарыхны сакълагъанла» патриот проектни магъанасы да уллуду, «Зарница 2» аскер-спорт оюннга уа 25000-ден аслам школчу къатышады.
«Юнармияда» 10000-ден аслам адам жыйылыпды, регионда аны 8 бёлюмю ачылгъанды. Жаш адамла кёп жамауат жыйылыулагъа къатышадыла, спортда жетишимлери, излеу ишлери ючюн ала саугъалагъа тийишли болгъандыла. «Юнармия» къымылдауну стратегиялы айныуунда тёрт магъаналы ыз белгиленеди – «Къоруулаучу», «Атлет», «Тинтиучю» эмда «Къураучу».
– Сабийле эмда жаш адамла бла ишни кючлегенлей турлукъбуз. Ксения Яновагъа бла Владислав Головиннге Къабарты-Малкъаргъа келгенлери, жаш тёлю жамауат башламчылыкъланы айнытыугъа бурулгъан байламлыкълагъа эм проектлерибизге себеплик этгенлери ючюн ыразылыгъымы билдиргенме, – деп жазгъанды Казбек Коков.
