2026 жыл Президентибиз Владимир Путинни башламчылыгъы бла Россейни халкъларыны бирлигини жылыча белгиленеди. Баш кюн а ол Къабарты-Малкъарда къууанчлы халда ачылгъанды.
Бу магъаналы иш Къырал музыкалы театрда кёп миллетлени, халкъланы, жамауат биригиулени келечилерин, культурада эмда искусствода, башха бёлюмледе да уруннган адамланы бирикдиргенди. Къууанчха келгенле бек алгъа театргъа кирген жерде кёрмючлеге эс бургъандыла. Аланы республиканы районлары эмда жамауат биригиулери, маданият аралары да къурагъандыла. Алада къолдан устала агъачдан, ташдан, минчакъладан, мияладан, къамишден этген сейирлик затланы, миллет кийимлени, ариу кийизлени, от жагъаны, оруслу, таулу, къабартылы отоуланы, республикабызда жашагъан миллетлени адет-тёрелерин, маданиятларын, жашау турмушларын туура этген кёп затны кёрюрге боллукъ эди.
Кеслерини чыгъармаларын Черек, Элбрус, Май, Прохладна, Урван, Терк, Чегем, Лескен районланы келечилери келтиргендиле. Аланы хар биринде да узакъ ёмюрледен къала келген тарыхларындан башлап, бу кюнледе миллет энчиликни сакълай, сабийле ишлеген затланы да эслерге боллукъ эди.
Кёрмючлеге КъМР-ни Башчысы Казбек Коков, КъМР-ни Парламентини Председатели Татьяна Егорова, Парламентни депутатлары, республикада министерстволаны бла ведомстволаны, миллет- маданият араланы, районланы, шахарланы, эллени башчылары, келечилери да къарагъандыла, районланы келечилери бла ушакъла да этгендиле.
Къууанчлы жыйылыу а, тёреде болуучусуча, Россейни гимнинден башланнганды. Аны концерт программагъа къатышхан битеу чыгъармачы коллективле жырлагъандыла.
Ызы бла сахнагъа республиканы Башчысы Казбек Коков чыкъгъанды. Ол, келгенлени бу аламат иш бла алгъышлай, Россейни кёп миллетли халкълары, узакъ жылладан бери да игиликге эмда тюзлюкге итине, Ата журтну келир заманы ючюн ол ниетде бирикгенлерин чертип айтханды.
«Ма ол биригиулюгюбюзню хайырындан деменгили къыралыбызны халкълары мамырлыкъда эмда келишиулюкде жашаргъа, аны бла бирге уа хар миллет да кесини ахшы тёрелерин, адетлерин, энчилигин, ана тилин, алай бла сейирлик россейли къыраллыкъны да сакъларгъа онг тапхандыла. Бизни миллет тамырыбыздан юзер, бир жанлы этер амал жокъду», - деп чертгенди Казбек Коков.
Республиканы Башчысы бюгюнлюкде, жашауда бола тургъан къужур тюрлениулени кезиуюнде, бир бирге ышаныулукъ эмда биригиулюк энчи магъананы тутханларын айырып айтханды. Ата-бабаладан къала келген ахшы тёрелени – шуёхлукъну, къарындашлыкъны, бирликни – сакъларгъа эмда кючлендирирге чакъыргъанды.
«Къабарты-Малкъарны халкълары къаллай болумлада да, узакъ ёмюрледе ата-бабаларыбызны Россей бла бирге болургъа деген осуятларына кертичилей къалгъандыла. Биз аланы ол осуятларын толтургъаныбыз бла ёхтемленебиз. Ала бизге, аладан сора келген тёлюлеге, Ата журтну кертичи жашлары бла къызлары болургъа насийхат этгендиле. Осуятлары бла насийхатлары Ата журтубузну сюерге, бирлеширге эмда къаллай сынауладан да бет жарыкълы ётерге болушхандыла. Тёлюлени араларында байламлыкъны заман, жылла, къыйын сынаула да юзалмайдыла», – деп къошханды республиканы Башчысы.
Энчи аскер операциягъа къатышханлагъа да Казбек Коков кёп махтау сёзлерин айтханды. «Ала Къабарты-Малкъарны кертичи жашларыдыла, кёп миллетлени, динлени келечилери бла бирге, жанларын-къанларын да аямай, Ата журтну сейирлерин къоруулайдыла, антларына кертичиликлерин, кишиликлерин да кёргюзтедиле. Аланы барысын да Ата журтха, туугъан жерлерине сюймеклик, борчларын ангылаулукъ, къыраллары ючюн жууаплылыкъ да бирикдиреди. Ала бла Къабарты-Малкъар эмда деменгили къыралыбыз ёхтемленедиле», – дегенди.
Ахырында КъМР-ни Башчысы республикада жашагъанланы хар бирин да Россейни халкъларыны бирлигини жылы ачылгъаны бла дагъыда бир кере алгъышлагъанды эмда быйыл кёп сейирлик проектле, жангы затла боллукъларына да ышандыргъанды.
Андан сора залда олтургъанлагъа республикада атлары айтылгъан жырчыларыбыз, тепсеу къауумла, ол санда «Балкария» къырал фольклор-этнография ансамбль, «Кабардинка» къырал академиялы тепсеу ансамбль, «Терк къазакъла» жыр эмда тепсеу къауум, «Глория», «Тауланы сабийлери», «Эльбрус», «Кавказны ёхтемлиги», «Насып» эмда башха ансамбльле аламат концерт кёргюзтгендиле. Нальчикде сабий садлагъа жюрюген, шахар, музыкалы школланы кичи классларында окъугъан жашчыкъла бла къызчыкъла уа, ариу кийимлери бла сахнагъа чыгъып, жырлап, тепсеп да къонакъланы бютюн къууандыргъандыла.
Байрамны кезиуюнде Къабарты-Малкъарда Россейни халкъларыны бирлигини жылы къууанчлы халда ачылгъаны бла Москвада жыр эмда тепсеу аскер ансамбль, Читаны, Нарьян-Марны, Уфаны, Калининградны, дагъыда кёп башха шахарланы чыгъармачы коллективлерини алгъышлаулары бла видеороликле кёргюзтюлгендиле. Поэтлерибизни шуёхлукъгъа, къарындашлыкъгъа, келишиулюкге чакъыргъан аламат назмулары да эшитилгендиле.
Ахырында «Балкария», «Кабардинка», «Терк къазакъла» да, чыгъып, гюрен туруп, бирден тепсегендиле. Залда олтургъанла бары да алагъа ёрге сюелип къарс ургъандыла.
Холаланы Марзият.
