КъМР-ни Башчысы Казбек Коков Правительствону юйюнде Къабарты-Малкъар Республикада 1941-1945 жыллада Уллу Ата журт урушда Хорламны 75-жыллыгъын байрамлау жаны бла къурау комитетни жыйылыуун бардыргъанды. Аны ишине КъМР-ни Правительствосуну Председатели Мусукланы Алий, КъМР-де баш федерал инспектор Тимур Макоев, министерстволаны бла ведомстволаны, муниципалитетлени, право низамны сакълаучу структураланы, жамауат эмда ветеран биригиулени башчылары къатышхандыла.
Кенгешде байрамгъа хазырланыуну бек магъаналы жумушлары белгиленнгендиле, ол санда ветеранлагъа болушлукъ этиуню, излеу эмда аскер-патриот ишни бардырыуну юсюнден сёлешиннгенди. Аскерчилени къабырларын, эсгертмелерин, сын ташларын жангыртыугъа бла тапландырыугъа энчи эс бурургъа кереклиси да чертилгенди.
Республиканы оноучусу Уллу Хорламны 75-жыллыгъын байрамлаугъа жууаплы кёзден къараргъа, аны бла байламлы не ууакъ жумушха да уллу кёллю болмазгъа кереклисин айырып айтханды. «Артыкъда ветеранларыбызгъа дайым да къайгъырып турургъа тийишлиди»,-деп, Казбек Коков Уллу Ата журт урушха къатышханлагъа, анда къыяулу болгъанлагъа, ёлген аскерчилени юй бийчелерине жыл сайын КъМР-ни Башчысыны Указы бла бир кере тёленнген ахчаны ёлчемин иги кесекге кётюрюуню дурус кёргенди. Жыйылыуда аны 2020 жылда 75 минг сомгъа жетдирирге оноу этилгенди.
Тюбешиуде салыннган борчланы араларында тарых кертиликни сакълаугъа, Уллу Ата журт урушну эмда аны жигитлерин эсде тутуугъа энчи магъана берилгенди. «Россейни Президенти Владимир Путин Нальчикде Миллетле аралы халланы советини жыйылыуунда чертгенича, «биз адам улугъа чексиз къыйынлыкъ сынатхан кезиуню юсюнден тюзню билирге эмда аны къорууларгъа борчлубуз».
Къырал башчыны ол насийхат сёзлери бюгюнлюкде бютюн магъаналыдыла, нек дегенде ол къанлы урушну терс кёргюзтюрге кюрешгенле болгъанларына биз шагъат болуп турабыз. Ол себепден кертини дайым ангылатыргъа, къаты къорууларгъа, Уллу Хорламда халкъыбызны юлюшюню юсюнден тохтаусуз айтып турургъа борчлубуз»,-дегенди Казбек Коков. Регионну Башчысы Уллу Хорламны байрамлау бла байламлы битеу белгиленнген жумушланы «бийик даражада толтурургъа» кереклисин эсгертгенди.
Жыйылыуда КъМР-ни культура министрини къуллугъун толтургъан Мухадин Кумахов, КъМР-ни жарыкъландырыу, илму эмда жаш тёлюню ишлери жаны бла министрини къуллугъун толтургъан Ауес Кумыков, КъМР-ни граждан обществону институтлары бла байламлыкъла къурау эмда миллетлени ишлери жаны бла министрини къуллугъун толтургъан Анзор Курашинов, урунууну эмда социал къоруулауну министри Асанланы Алим, Нальчик шахар округну жер-жерли администрациясыны башчысы Таймураз Ахохов, Урушну, урунууну, Сауутланнган кючлени эмда право низамны сакълаучу органланы ветеранларыны (пенсиячыларыны) Къабарты-Малкъар советини таматасы Мухамед Шихабахов да сёлешгендиле.
