«Къабарты-Малкъар Республиканы жигитлери» деген проект республикада андан ары бардырыла, огъурлу ишин жетишимли тамамлайды. Ол энчи аскер операциядан къайтханланы жюреклери жаратхан усталыкъгъа юйретир эмда ишге тохташыргъа себеплик этер мурат бла башланнганды. Анга къатышханлагъа къырал эмда муниципал органлада ишлерча, билим алыргъа эмда ишни эбине тюшюнюрге болушлукъ тапдырылады.
СВО-ну ветеранларына билим бериуню биринчи кезиую жетишимли бошалгъанды. РФ-ни Президентинде Халкъ мюлкню бла къырал службаны россейли академиясында окъуп чыкъгъанла теорияны бла практиканы бирлешип бардыргъанларыны хайырындан  усталыкълары бла байламлы сынауларын, билимлерин да ёсдюрюрге онг тапхандыла.
Программагъа  31 адам къатышханды. Аланы хар бири да кеслерини хунерлерин, онгларын да ачыкълагъандыла эмда усталыкъларын ёсдюрюрге, социал болумларын игилендирирге да кёлленнгендиле.
Проект  дагъыда  СВО-ну жигитлерине, регионда магъаналы ишлеге бла оноулагъа къатыша, гитче ата журтларын айнытыугъа юлюшлерин къошаргъа онг береди. Аны биринчи кесеги ахырына жетген эсе да,  алыкъа кёп иш тамамларгъа тюшерикди. Биринчи атламны  эсеплери уа  таукеллик бередиле эмда бу жолну сайлау тюз  болгъанына шагъатлыкъ этедиле. 
Проектни экинчи кезиуюн быйыл бардырыргъа белгиленеди. Анга кёре ветеранла къошакъ халда эки тюрлю билим аллыкъдыла, стажировканы ётерикдиле эмда кеслерини башламчылыкълары жашауда бардырылырча мадарла этерикдиле. 
Регионну айнытыуда эмда аны халкъыны жашау къолайлыгъын игилендириуде власть органланы, жамауат биригиулени эмда ветеранланы байламлыкъда ишлеулери кесини хайырын кёргюзтгенди. Алайды да, «КъМР-ни жигитлери» деген проект энчи аскер операциягъа къатышханлагъа къайгъырыу регионну экономика эмда социал жаны бла да айныууна да себеплик этгенини аламат юлгюсюдю.

Далхатланы Марзият