Бу кюнледе КъМР-ни Миллет музейинде «Гардарика Кавказа» уллу арт-фестивальны чеклеринде суратлау кёрмюч ачылгъанды. Ол Россейни халкъларыны бирлигини жылына жораланнганды. Анда шёндюгю заманны искусствосун суратлагъан 200-ден артыкъ чыгъарма салыннганды. Аланы авторлары атлары айтылгъан суратчыладыла. Ала Москвадан, Санкт-Петербургдан, Сочиден, Ставрополь, Краснодар крайладан эмда Россейни кёп башха шахарларындандыла.
Къабарты-Малкъардан а Ахматланы Леуанны, Акъкъызланы Керимни, Валерий Захоховну, Рузанна Дацирхоеваны, Наиля Галимованы, Юлия Зеленскаяны, Ярослав Галинскийни, Дина Хашхожеваны, Кантемир Жиловну, Михаил Ваннахны чыгъармалары кёрмючде магъаналы жерни аладыла.
- Ючюнчю жыл барады биз «Гардарика Кавказа» арт-проект бла ишлегенли,- дегенди, кёрмючню ача, Миллет музейни баш директору Феликс Наков. – Кёрмючдеги ишле барысы да бийик профессионал эмда художестволу даражада этилгендиле. Арт-проектни хайырындан бизни музейге келген белгили художникле бла тюрлю-тюрлю ишле бардырыр онгла да ачылгъандыла. Музейде «тёгерек столла», мастер-классла, экскурсияла да бардырыладыла. Бу проект мындан ары бютюн кенгере барлыгъына ышанабыз, аны хайырындан уллу искусствогъа жууукълашырыкъбыз.
РФ-ни Художниклерини союзуну республикада бёлюмюню таматасы Жанна Канукова кёрмюч кёчюрюлюучю болгъанын, андагъы чыгъармала Кавказны башха шахарларында да кёргюзтюллюклерин билдиргенди. Дагъыда Къабарты-Малкъарны художниклерини ишлери проектге бек тап жарашып киргенлерин, ала музейни залыны бир къабыргъасын саулай алгъанларын да ёхтемлик бла айтханды.
Арт-проектни автору, Искусствоведлени ассоциациясыны таматасы Римма Кириллова «Гардарика Кавказ» проектни къураугъа кёпле къатышханларын, КъМР-ни Миллет музейинде ишлегенлени, искусствоведлени да къыйынлары киргенлерин айтып, ыспас этгенди.
- Россейни халкъларыны бирлигини жылында биз деменгили къыралыбызны тюрлю-тюрлю республикаларында, крайларында, областьларында жашагъан фахмулу художниклени бирикдиргенбиз. Ала, фахмуларын, усталыкъларын да къызгъанмай, бизге юлюш этедиле. Фестивальны белгилеп айтырча жумушларындан бирине уа быйыл Къабарты-Малкъарны Художниклерини союзу бла бирге ишлеуню санаргъа боллукъду. Алай бла кёрмючде сизни республиканы суратчыларыны атлары да айтыладыла. Арт-фестиваль мындан ары да биригиулюкге, айныугъа себеплик этген жер боллугъуна ышандырама, - дегенди Римма Кириллова.
- Биз мында эсселени соло-проектлерин да кёргюзтебиз. Ала ондула. Алада суратланы авторларыны, дагъыда КъМР-ден онюч художникни юсюнден толу хапар билирге боллукъду, - дегенди кёрмючню куратору Елена Пинижанинова да.
Бу сурат фестиваль Май, Прохладна районланы майданларында да ётерикди. Аны юсюнден билдире, Римма Кириллова былай эсгергенди: «Озгъан ёмюрню ахырында Къабарты-Малкъаргъа художник Пётр Костенко келген эди. Ол Залийханланы Михаил бла бирге туугъан жерине бла юйюне барып, академикни суратын ишлеген эди. Ол юйге 300 жылдан артыкъ болады. Художник Залийханланы Михаилни суратын Миллет музейге саугъагъа бергенди».
Фестивальны ачылыууна жораланнган къууанчлы ишни ахырында Феликс Наков къонакълагъа Миллет музейни атындан грамотала бергенди. «Гардарика» фестивальны грамотасына озгъан жылны жай айларында Петербургда болгъан кёрмючге къатышхан Къабарты-Малкъардан художникле Ярослав Галинский эмда школчу Зара Тхагазитовагъа да тийишли болгъандыла.
Холаланы Марзият
