Шалушкада амбулатория 1988 жылда ишленнгенди. Андан бери анга бир кере да тынгылы ремонт этилмегенди. Ол себепден иги да тозурагъан эди, аны бла бирге тынгылы медицина болушлукъ берирча излемлеге да артыкъ келишмегенди, деп билдириледи КъМР-ни Саулукъ сакълау министерствосуну пресс-службасындан.
Сагъынылгъан сылтаула бла байламлы аны игилендирирча «Узакъ ёмюрлю эмда  тири жашау» миллет проектни «Биринчи болушлукъ берген бёлюмюн  жангыртыу» регион программасына къошулургъа онг табылгъанды. Бюгюнлюкде амбулаториягъа тынгылы ремонт этилгенди.
Ишлени кезиуюнде башында къанжалларын,  жылытыучу системасын, инженер сетьлерин, терезелерин, эшиклерин алышып, ич эм тыш къабыргъаларын сюртюп-бояп бошагъандыла.  
Амбулатория «аяулу» амал бла ишлейди. Аны баш магъанасы – саусузлагъа эм врачлагъа да хар жаны бла тап болурча этергеди. Эм игиси уа тынгылы медицина болушлукъ берилликди. Ишлени кезиуюнде бёлюмле кенг эм жарыкъ болурча, хауа иги жюрюрча этгендиле эм башха жумушла да тамамланнгандыла. Мында терапевтни, педиатрны, акушер-гинекологну эм стоматологну   кабинетлери эм кюндюз жатханлагъа стационар да ишлерикдиле. Ол санда регистратура, процедурала бардыргъан, къан алгъан, биринчи болушлукъ тапдыргъан, диагностика этген кабинетле ким да къыйналмай табарча орналадыла. Саулукълары бла байламлы чекленнген онглары болгъанла жунчумазча да мадар этилгенди.
 Ишлени кезиуюнде стационарны ырысхы-техника мурдору да жангыртылгъанды. Бюгюннгю излемлеге келишген мебель эм медицина оборудование да алыннгандыла.
Бюгюнлюкде медицина мекям эсепде болгъан 9360 адамгъа къарайды, ол санда 3059 сабийге. Планнга кёре, бир жолгъа   аны 70 саусуз жокъларгъа боллукъдула.  
Проектде белгиленнгенича, амбулаторияны тыш къабыргъаларын эм арбазын да айбатландырырча мадар этилликди. Аны бла байламлы ишле жылы киргенлей башланырыкъдыла.
 
Курданланы Сулейман.