Хьэмидей къуажэм (Тэрч район) дэт ЩэнхабзэмкIэ унэм и «Шабзэ» къэфакIуэ гупым япэ увыпIэр къыщихьащ Краснодар къалэм иджыблагъэ къэрал куэдым я лIыкIуэхэм хэту щекIуэкIа «Созвездие талантов» XI зэпеуэм.
КъэфакIуэхэр илъэситI хъуауэ егъасэ Хьэпэ Артур. Узэрыгушхуэнщ зэман кIэщIым къриубыдэу апхуэдэ ехъулIэныгъэшхуэ гупым зэрызыIэригъэхьар.
Къэралым и щIыналъэ куэдым къикIа-хэр зэхуишэсат а фестиваль-зэпеуэм. Абы хэтахэм я Iэзагъэр къыщагъэлъэгъуащ щэнхабзэм и унэтIыныгъэ зэмылIэужьыгъуэхэм - циркым къыщыщIэдзауэ декоративно-прикладной гъуазджэм щыщIэкIыжу.
«Шабзэ» гупым хэт хъыджэбз 16-м зэпеуэм щагъэлъэгъуащ ди лъэпкъ къэфэ-кIэхэм я дахагъэр. Абыхэм ягъэзэщIа «Лъапэрисэ» къафэрщ зэхьэзэхуэм «ЦIыхубэ-утыку къэфэкIэ» и Iыхьэм пашэ щыхъуар. КъэпщытакIуэхэр набдзэгубдзаплъэу кIэлъыплъащ къэфакIуэхэм я утыку итыкIэм, зыIыгъыкIэмрэ Iэзагъэмрэ, фащэр къазэрыщыпсым.
«Шабзэ» ансамблым и унафэщI Хьэпэ Артур жеIэ хъыджэбзхэм зыIэрагъэхьа ехъулIэныгъэр дэтхэнэри Iуэхум егугъуу, жэуаплыныгъэ хэлъу зэрыбгъэдыхьам къыпэкIуауэ.
Гупым зыщаплъыхьащ Галицкэм и цIэр зэрихьэу Краснодар щыIэ зыгъэпсэхупIэ цIэрыIуэми. Шэч хэлъкъым къэфакIуэ ныбжьыщIэхэм мы гъуэгуанэр ягу къызэринэжынум.
Iуэхум и къызэгъэпэщакIуэхэм къызэрыхагъэщщи, апхуэдэ зэхьэзэхуэхэм щэнхабзэм зрагъэужь къудейкъым, атIэ щIыналъэхэм я зэпыщIэныгъэри езыгъэфIакIуэщ.
БАГЪЭТЫР Луизэ.
