Къэбэрдей-Балъкъэр Республикэм и прокуратурэм къыщапщытэжащ блэкIа илъэсым я лэжьыгъэм кърикIуахэр, яубзыхуащ законымрэ хабзэмрэ гъэбыдэным ехьэлIауэ 2026 гъэм зэфIахыпхъэхэр. Коллегием и зэIущIэм кърихьэлIащ Урысей Федерацэм и Прокуратурэ нэхъыщхьэм Кавказ Ищхъэрэ, Ипщэ федеральнэ щIыналъэхэмкIэ и Управленэ нэхъыщхьэм - ­КИФЩI-м щиIэ управленэм и унафэщI Болдыревэ Еленэ. 

Коллегием и лэжьыгъэм хэтащ республикэм и прокурорым и къуэдзэхэр, щIыналъэ прокуратурэм и IэнатIэхэм я унафэщIхэр, оперативнэ гупыр, къалэхэмрэ районхэмрэ я прокурорхэмрэ абыхэм я къуэдзэхэмрэ. 
Къэбэрдей-Балъкъэр Республикэм и прокурор Хабаров Николай зэIущIэр къыщызэ­Iуихым къыхигъэщащ щIыналъэм законымрэ хабзэмрэ ехьэлIа щытыкIэр зыщыхуэдэр, ахэр зэпIэзэрыту щытыным прокурор кIэ­лъыплъыныгъэм щигъэзащIэ къалэным. Абы къыхигъэщащ я лэжьыгъэм и унэтIы­ныгъэхэр УФ-м и Прокурор нэхъыщхьэм япэ игъэщыпхъэу къахуигъэувахэмрэ тету, республикэм и социально-экономикэ щытыкIэм кърикIуахэмрэ зэпалъытыжу зэраубзыхуар. 
Прокурорхэм зэфIагъэувэжащ республикэм щыпсэухэм ящыщу мини 6,6-м щIигъум я хуитыныгъэхэр, дзэ Iуэху хэхам хэтхэмрэ абыхэм я унагъуэхэм щыщхэри хыхьэу. Гулъытэ хэха хуащIащ лэжьапщIэр зэратым. Сыт щыгъуи прокуратурэм и нэIэ ятетщ щIыхуэ зытелъ IуэхущIапIэхэу банкроту къалъытахэм, апхуэдэуи щIыналъэм и IэнатIэ ­нэхъ инхэм. ЛэжьапщIэ щIыхуэу сом мелуан 72-м щIигъу ирагъэпшынащ, лэжьакIуэ мин 1,5-м я хуитыныгъэхэр зэфIагъэувэжащ. ­Балигъ мыхъуахэм я хуитыныгъэхэр хъумэным пыщIа Iэмал псори къагъэсэбэпащ. 
ПсэупIэ хуэныкъуэхэр къызэгъэпэщыным хухах щIыналъэ бюджетым сом мелуан 52,5-рэ хагъэхъуэныр пхагъэкIри, ар мелуани 173,4-рэ хъуащ. Абы и фIыгъэкIэ, сабий зеиншэхэмрэ адэ-анэм я нэIэ темыту къэнахэмрэ псэупIэхэр, апхуэдэуи федеральнэ, щIыналъэ псэупIэ сертификатхэр яIэрыхьащ.  
Болдыревэ Еленэ къыщыпсалъэм къыхигъэщащ дзэ Iуэху хэхам хэтхэмрэ абыхэм я унагъуэхэм щыщхэмрэ я хуитыныгъэхэр, цIыхухэм я социальнэ хуитыныгъэхэр, пенсэм, псэупIэм, лэжьыгъэм ехьэлIахэри хы­хьэу, хъумэныр я къалэн нэхъыщхьэхэм ящыщу зэрыщытыр. Гулъытэ зыхуэщIыпхъэу къигъэлъэгъуащ лэжьапщIэмрэ пособиемрэ зэрыратыр, псом хуэмыдэу балигъ мыхъуа­хэм ехьэлIахэр, льготэ зиIэхэм хущхъуэхэмрэ зыхуэныкъуэ Iэмэпсымэхэмрэ яIэрыхьэныр. 
Апхуэдэуи жиIащ цIыхухэр фIагъ зиIэ коммунальнэ IуэхутхьэбзэхэмкIэ къызэгъэпэ­щыным, инфраструктурэ объектхэр егъэ­фIэ­кIуэным, фэтэр куэду зэхэт унэхэр зыхуей хуэгъэзэным, лъэпкъ проектхэр пхыгъэкIыным Iэмал имыIэу хэкIыпIэхэр дыщIыгъун зэры­хуейр. 
Коллегием и лэжьыгъэм кърикIуахэм япкъ иткIэ къащтащ прокуратурэм и кIэлъы­плъы­ныгъэр егъэфIэкIуэным ехьэлIахэр къы­щыгъэлъэгъуа унафэ, - къет КъБР-м и прокуратурэм и пресс-IуэхущIапIэм. 
Зыгъэхьэзырар  ДЫГУЛЫБГЪУ  Жантинэщ.