ГъэпцIакIуэхэр куэд хъуащ ди зэманым. Псом хуэмыдэу телефонкIэ апхуэдэ мыхъу­мыщIагъэ зезыхьэ щIэпхъаджащIэхэм махуэ къэс япэщIохуэ цIыхубэр. 

Сыт хуэдизрэ тепсэлъыхьми, гу лърагъатэми, абыхэм я хъым ихуар мин бжыгъэ мэхъу. Мы Iуэхум псом хуэмыдэу тоунахъуэ иджырей технологиехэм мащIэу фIэкIа хэзымыщIыкI нэхъыжьыIуэхэр, гупсысапIэ кърамыту къызы­тегушхуэ курыт ныбжьым итхэр, балигъыпIэ имыува, жепIэр зи фIэщ хъу ныбжьыщIэхэр. 
Апхуэдэ Iуэху мыщхьэпэм хэкIыпIэ къыхуа­гъуэтыну яужь ихьащ Бахъсэн къалэ администрацэм и лэжьакIуэхэр. Абыхэм ящыщ зыбжанэ я фIэфIыныгъэкIэ зэгухьэри, дружинэ къызэрагъэпэщащ. ЛэжьакIуэ гупым яхэтщ Урысейм и МВД-м и полицэм и участковэ уполномоченнэхэр. 
Зи гугъу тщIыхэм уэрамхэм щрагъэкIуэкIащ телефонкIэ, интернеткIэ гъэпцIагъэ зезыхьэ­хэм зэрапэщIэт, киберщIэпхъаджагъэм жы­ла­гъуэр щыхъумэным теухуа Iуэху. ГъэпцIа­кIуэхэм зэрызыщахъумэ щIыкIэхэм цIыхухэр нэхъ куууэ щыгъэгъуэзэным щIэх-щIэхыурэ йолэжь гупыр. Акцэр щрагъэкIуэкIыну цIыху зэхуэсыпIэхэр къыхахащ, Бахъсэн къалэм щыпсэу нэхъыбэ къызэщIаубыдэн папщIэ. 
Гупым хэтхэмрэ полицейхэмрэ зэпкърыхауэ цIыхухэм яхутепсэлъыхьащ интернетымрэ мобильнэ телефонхэмрэ къагъэсэбэпу щIэпхъаджащIэхэм ялэжь гъэпцIагъэ Iэмал нэхъ ин дыдэхэм, бзаджащIэхэм зэрызыщахъумэнум. Гулъытэ хэха хуащIырт банк картэхэм кърадыгъукIхэмрэ уи хъыбархэр хъумэн зэрыхуей щIыкIэхэмрэ. 
ЛэжьакIуэхэм хъыбарегъащIэ тхылъымпIэ­хэмрэ буклетхэмрэ ягуэшащ, зи гугъу тщIы Iуэхум теухуа чэнджэщ щхьэпэхэр иту. Акцэм хэтхэм къыхагъэщащ хьэпшыпхэр къэщэху­ным е Iуэхутхьэбзэхэр уасэ пудкIэ яхуэщIэным теухуауэ «фейдэ зыпылъ», гурыщхъуэ уэзыгъэщI жэрдэму къыхуагъэлъагъуэхэм зыща­дзеймэ зэрынэхъыфIыр. Къалэдэсхэм быдэу жраIащ банк картэхэм тет бжыгъэхэмрэ реквизитхэмрэ зыми ирамыгъэщIэну, уголовнэ, административнэ законодательствэм и статьяхэм къыщыхьа мыхъумыщIагъэхэр къэмыхъун папщIэ.
Дарий  Дахэнур.