Къабарты-Малкъарны колледжлерини окъуучулары «Жашауну жорукълары» ангылатыу жумушлагъа къатышхандыла.  Къырал автоинспекторла, Россейни МВД-сыны «Нальчик» управлениясыны жамауат советини келечиси Аттоланы Диана бла бирге «Къурулушчу» колледжде болгъандыла.

Къонакъла жаш адамлагъа эркинликлерин бла борчларын ангылатхандыла, бузукълукъла ючюн  административ эм уголовный жууаплылыкъны юсюнден айтхандыла, жолда къоркъуусузлукъну жорукъларына энчи эс бургъандыла. Полициячыла акъылбалыкъ болмагъанланы къатышыуу бла аварияланы юлгюге келтиргендиле, жолда жюрюуню жорукъларын сакъламагъан кезиуде къаллай хатагъа тюшерге боллукъларын да айтхандыла. Сёз правалары болмай, машинаны жюрютгенде   жууаплылыкъны, жаяу болгъан кезиуде къоркъуусузлукъну жорукъларыны юслеринден да баргъанды.  

Тюбешиуде  аварияланы, алагъа тюшгенлени жашаулары къалай тюрленнгенини юсюнден видео да кёргюзтюлгенди.   Жаш адамла къонакъланы айтханларына тынгылагъандыла, соруула бергендиле, кеслерини оюмларын айтхандыла.

Тикаланы Фатима хазырлагъанды.