Къэбэрдей-Балъкъэрым СпортымкIэ и ми­нистерствэм блыщхьэ кIуам щрагъэблэгъащ Ярыгин Иван и Кубокыр къэхьыным хуэунэтIауэ Красноярск къалэм щекIуэкIа зэ­хьэзэхуэм къыщыхэжаныкIа, килограмм 74-рэ зи хьэлъагъхэм я деж нэхъапэм къэмы­хъуауэ япэ увыпIищыр щызыубыда БищIо Тимур, ЗэкIуий Анзор, Шэрий Иналбэч (сурэтым) сы­мэрэ я тренерхэмрэ. Ахэр яIущIащ республикэм и журналистхэм икIи абыхэм я упщIэхэм жэ­уап­хэр иратащ, зэхьэ­зэ­хуэм тепсэ­лъы­хьащ. 

ЗэIущIэр къыщызэIуихым, КъБР-м спортымкIэ и министр Хьэсанэ Ислъам жиIащ ди щIалэхэм я ехъулIэныгъэм икъукIэ зэрыщыгуфIыкIар икIи зэрыригушхуэр, гуапэуи хьэ­щIэ­хэм ехъуэхъуащ.
«БэнэкIэ хуитым дихьэххэм ящIэ Ярыгин Иван и Кубокыр къэпхьыным дапхуэдиз пщIэ­рэ щIыхьрэ пылъми. Абы щытекIуахэм Iэмал ягъуэт Европэм и чемпионатым хэтыну. Ди спортсменхэм ехъулIэныгъэфI дыдэхэр щызыIэрагъэхьащ Красноярск къалэм, уеблэмэ нэхъ пщIэ зыпылъ, зэныкъуэкъур щынэхъыбэ, килограмм 74-рэ зи хьэлъагъ гупым. Псоми гуапэу сынывохъуэхъу ди щалэхэм къагъэлъэгъуа зэфIэкI лъагэхэмкIэ», - жиIащ минист­рым. 
Ди бэнакIуэхэм я тренер ЗэкIуий Арсен тфIэ­хьэлэмэту деупщIат, финалым щызэхуэза ди щIалитIым – БищIо Тимуррэ ЗэкIуий Ан­зор­рэ –  яжриIа псалъэхэмрэ езы зэ­Iу­щIэр къызэрыщыхъуамрэ зэдгъэщIэну. Абы и жэ­уапыр мыращ:
«Сэ щIалитIри си гъэсэнщ, абы къыхэкIыуи, я Iуэхум сыхэIэбакъым, зыми сыкъыщхьэщы­жа­къым, лейуэ зыри тезгъэгушхуакъым. Абыхэм я зэIущIэм кIэлъыплъар, чэнджэщхэр езы­тар езыхэм я ныбжьэгъухэрщ. ЩIалитIми ящIэн хуейр ящIэж, япэу зэхуэзэу аракъым – утыкум ихьэхэри, иджыри зэ зэбэнащ». 
КIэух зэхьэзэхуэм икIын ипэ къихуэу ЗэкIуий Анзор къыпэщIэтащ Олимп джэгухэм я чемпион, бэнакIуэ цIэрыIуэ Сидаков Заурбэч. Ди гуапэ зэрыхъущи, ди щIалэм ар къихьащ. А зэхьэзэхуэр зэрекIуэкIамрэ абы иужькIэ осетин щIалэм зэрыхагъэщIар къызэрыщыхъуам­рэ тедгъэпсэлъыхьыну ЗэкIуийм зыхуэдгъэзати, къыджиIащ:
«Заурбэч щэнейрэ себэнащ. Иджырейми, сы­зэрытекIуэным схущIэкъуащ икIи абы зы­хуэзгъэхьэзыращ. Апхуэдэ бэнакIуэ лъэщыр хэбгъэщIэну икъукIэ гугъущ, ауэ зы Iэмал гуэркIэ къэзубыдын схузэфIэкIащ. А зэIущIэм щхьэкIэ ар згъэхьэзырат икIи, и кIэм деж, згъэзэщIэну къызэхъулIащ. Дэ зыщIэдгъасэр, утыку дыщIихьэр апхуэдэ спортсменхэм датекIуэн щхьэкIэщ.
ЗэIущIэ нэужьым къуэшым хуэдэу IэплIэ къыс­хуищIащ Заурбэч. ЕтIуанэ махуэми хъар­зынэу дызэпсэлъащ. ИкъукIэ щIалэфIщ, цIыху­хъу нэс жыхуаIэхэм хуэдэщ ар. Сыт щыгъуи гуапэу дызэхущытщ». 
Финалыр БищIом зэрыфIихьам Сидаковым и зэран хэлърэ хэмылърэ, абы къару лей тригъэкIуэда жыхуэтIэу, зэдгъэщIэну дыщеуп­щIам, Анзор жиIащ, а текIуэныгъэм уеблэ­мэ къару лей къызэрыритар икIи зэрытригъэгуш­хуар, ауэ Тимур нэхъ лъэщу къыщIэ­кIащ а махуэм. 
КIэух зэхьэзэхуэм и адрей Iыхьэ ныкъуэм щызэхуэзат БищIомрэ Шэриймрэ икIи зэрытемыгъэкIуауэ, бжыгъэр 1:1-уэ, иухат ар. Ауэ, иужьрей баллыр Тимур къызэрихьам къы­хэкIыу, текIуэныгъэр абы иратат. ЩIалэ­хэм тIуми жаIащ лъэщу зэрызэпэщIэтар, зым адрейр къызэрыпимыкIуэтар, ауэ Iуэхур апхуэдэу хъуащ. 
ЩIалитIым я зэхьэзэхуэм теухуауэ тренер ЗэкIуий Арсен къыхигъэщащ бэнакIуэ лъэщ­хэр, я IэзагъкIэ зэхуэдэу, щызэхуэзэм деж текIуэныгъэр къэпхьыну куэдкIэ зэрынэхъ гугъур. Абдежым къарури, техникэри, акъылри псори зэхэплъхьэн хуей мэхъу, уи хьэрхуэрэгъур щыбгъэуэн е и щыуагъэ IэщIэкIар къэбгъэсэбэпу ар къэбубыдын щхьэкIэ. ЗэфIэкI нэхъ мащIэ зиIэ спортсменхэм ущебэным дежщ зэIущIэм и бжыгъэр 10:0-хэм хуэдэу къыщыпхуэхьыр. 
Къэбэрдей-Балъкъэрым и бэнакIуищ текIуэныгъэм и лъагапIэм и теувапIищми зы зэпеуэм къриубыдэу зэрыдэкIуеяр къазэрыщыхъуамкIэ щIалэхэм дащеупщIам, БищIом жиIащ, абы фIэкIа а Iуэхум гъэщIэгъуэну нэгъуэщI гуэри зэрыхэмылъыр, сыту жыпIэмэ, езы спортсменхэм я дежкIэ адрей текIуэныгъэхэм ар къащхьэщыкIыркъым. 
ЗэкIуий Арсен къыхигъэщащ Красноярск ежьэн ипэ къихуэу егъэджэныгъэ-зыгъэсэныгъэ зэхуэсу тIу зэрырагъэкIуэкIар, ерыщу абы зэ­рызыхуагъэхьэзырар. Абы къыхэкIыуи, щIы­пIэ министерствэм фIыщIэ хуищIащ сыт и лъэ­ныкъуэкIи къазэрыдэIэпыкъум, лъэIухэр гулъытэншэ зэримыщIым папщIэ. 
Апхуэдэуи Арсен жиIащ УФ-м бэнэкIэ хуитымкIэ пашэныгъэр къыщыхьыным хуэунэтIауэ Владикавказ къалэм мыгувэу щекIуэкIыну зэхьэзэхуэм, зи ныбжьыр илъэс 21-м щIимыгъуахэр щызэпеуэнум, зэфIэкI зыбгъэдэлъ ди щIалэ зыбжанэ зэрыхэтынур. Тренерым къыхигъэщащ зэман кIэщIкIэ ахэри ди командэ нэхъыщхьэм къыхыхьэну, нобэ ягъэлъапIэхэм къакъуэувэну, уеблэмэ я зэфIэкIхэмкIэ ящ­хьэщыкIыну зэращыгугъыр. 
Къызэхуэсахэр тепсэлъыхьащ бэнэкIэ хуитым и Iуэхур республикэм зыщыIутым, абы зэрызиужь щIыкIэм икIи къыхагъэщащ фIы и лъэныкъуэкIэ зэрызытхъуэжым ди гъунэгъу шэ­шэнхэм, дагъыстэнхэм, осетинхэм гу зэ­рылъатар. 
«БэнэкIэ хуитымкIэ ди командэм иджыпсту зиIэтащ. ТхузэфIэкIри дызыхунэмысари до­лъагъу, зэлэжьыпхъэхэри етхьэкIыркъым. КъБР-м­ БэнэкIэ хуитымкIэ и федерацэр куэд щIа­къым къызэрызэрагъэпэщыжрэ икIи, си гугъэщ, дызэгъусэу куэд тхузэфIэкIыну», - жиIащ министрым.
ЗэIущIэм и кIэухым КъБР-м СпортымкIэ и министерствэм къыбгъэдэкIыу Хьэсанэм фIы­щIэ тхылъхэр яритащ ягъэлъэпIа спортс­менхэм я тренерхэм. 
Сурэтри тхыгъэри
ХЬЭЩЫКЪУЕЙ Олег ейщ