Врачла бла кёп кере тюбеширге тюшгенди. Насыпха, больница ундурукъда угъай. Мени медицина билимим жокъду, болсада бу усталыкъны сайлагъанланы ишлери тынч болмагъанын, кюн сайын да ала тюрлю-тюрлю къыйынлыкълагъа тюбей, кёре келгенлерин биле, жюрегимден хурмет, ыспас да этеме.
Бюгюннгю ушакъ нёгерим а Биттирланы Танукну къызы Халиматды. Ол жашаууну элли жыл чакълы бирин адамлагъа болушлукъ этиуге бергенди. Ана жууукъларым Биттирладан болгъанына да къарамай, Халиматны беш-алты жыл мындан алгъа таныгъанма, ишни юсю бла терк болушлукъ берген станциягъа баргъанымда. Чырайлы, чачын да тап жыйып, чыммакъ акъ халаты бла стол артында олтургъан тиширыу, мен кабинетге киргенлей, ёрге туруп, аллыма келип, къолун узатады.
- Билемисе, мен сени таныгъанлы къыркъ жылдан атлагъанды. Лермонтов орам бла Ленин проспектни мюйюшюнде болуучу эди редакциягъыз. Алайтын ишге ёте туруп, сизге, журналистлеге, къарап, сукъланып кетиучю эдим. Мен да журналистиканы бек сюйгенме. Алай, анам айтханны этип, медицинагъа келгенме. Ма энди уа жууукъ танышдыкъ, - дейди Халимат, ышара.
Хапар айта келгенде, Халимат Акъ–Сууда 15-чи номерли мектепни бошагъанын, андан сора Нальчикде медицина училищеге кирип, фельдшер усталыкъны алып чыкъгъанын да билеме.
-Анамы къарындашы Гузиланы Тамукну жашы Махмут да Нальчикде медицина училищени бошап чыкъгъан эди. Ол терк болушлукъ берген станцияда фельдшер болуп ишлегенди. Усталыгъына жюреги бла берилгени, саусузлагъа жан аурутханы, алагъа жараргъанын кёрсе, къууаннганы манга юлгю эдиле.
Анам да: «Махмутча, адамлагъа жарарса, медик бол», - деп тилей эди. Ма ол затла хорлагъан болур эдиле мени бу усталыкъны сайлауума, аны къой, битеу жашаууму иши да болуруна, - дейди Халимат ушагъыбызны кезиуюнде.
Жигер къыз училищеде окъуй тургъанлай, 1-чи номерли шахар больницаны терк болушлукъ берген станцияда фельдшер болуп ишлеп башлагъан эди. Энди уа Къабарты-Малкъарны Катастрофаланы медицинасы эмда терк медицина болушлукъ берген арасында тамата фельдшерди. «Кертисин айтсам, бу ишге 1990 жылда салыннганма. Андан бери асламысында административ иш бла кюрешеме. Мени башчылыгъымда терк болушлукъ берген станцияда орта эмда кичи медицина персонал ишлейди. Мен а ала ишлерин тынгылы бардырырларын къурайма, анга жууаплыма. Биз къаты байламлыкъда бардырабыз ишибизни: къыйын кезиулени неда къужур болумланы бирге сюзебиз. Сынаулары болгъанла жаш специалистлеге насийхатлыкъ этедиле»,- дейди Халимат.
Ол кеси да устазларын, ишлеп башлагъан кезиуюн, насийхатчыларын да уллу хурмет бла эсгереди. «Училищеде устазларым кёз къарамымы тохташыууна уллу къошумчулукъ этгендиле. Ала сайлагъан усталыгъыбызны сюерге, анга кертичи болургъа, толусунлай берилирге юйретгендиле. Аланы араларында Ю.М.Дукельскийни, Е.А.Мерейкону атлары бюгюн да эсимдедиле. Бюгюнлюкде уа мен да бизге практикагъа келген жаш адамлагъа ала айтып юйретген затланы къатлайма.
Ишлеп башлагъанымда да, манга кёпле болушхандыла, медицинадача, административ ишде да кёп затха ишчи сынауларындан юлюш этгендиле, юлгюлери бла да юйретгендиле»,- дейди огъурлу тиширыу.
Терк болушлукъ бериу жаны бла ишлеу, сёзсюз, магъаналыды, аны бла бирге уа бек къыйын, дайым сагъайып турууну, андан сора да, тириликни, ауур акъыллылыкъны эмда ариу тилли болууну да излеген сунама.
- Хау, ишибиз тынчды деп айталлыкъ тюйюлме. Терк болушлукъ берген машинада фельдшер болуп ишлегенимде, кёзюбюзню бир такъыйкъагъа да къысмай чыкъгъан кечелерибиз кёп болгъандыла. Ол сен санагъан ышанлагъа мен дагъыда уллу кюч-къарыу, тёзюмлюк да излегенин къошарыкъ эдим.
Биз медицинаны кинода кёргюзтгенлерича угъай, жашауда болгъаныча кёребиз. Терк болушлукъ берликлени чакъыра, саусуз алагъа бек ышанады. Аны себепли бизни не аз да жангылыргъа, аны сокъурандырыргъа эркинлигибиз жокъду. Къысха заманны ичинде къолдан келген, келмеген да амалланы этерге борчлубуз. Саусузгъа болушлукъ этгенден сора да, къоркъмазча, тынчайырча, бизге ийнанырча эте билирге да керекбиз. Къалай-алай десек да, дарман, укол бирди, ариу, жапсарыу сёз а башхады, - дейди уста.
Кёп жылланы бет жарыкълы ишлегени, усталыгъына кертичи болгъаны ючюн да Халимат дайым махтаугъа тийишли болуп келеди, сыйлы къырал саугъала бла да кёп кере саугъаланнганды. Аланы араларында КъМР-ни Правительствосуну сыйлы грамотасын, РФ-ни эмда КъМР-ни Саулукъ сакълау министерстволарыны сыйлы грамоталарын бютюн бек багъалайды. Анга Къабарты-Малкъар Республиканы саулукъ сакълаууну сыйлы ишчиси деген ат да бошдан берилмегенди. «Хау, кёлкъалды этерча тюйюлме, кёпдюле къырал саугъаларым, ала манга бек багъалыдыла. Алай бек уллу саугъагъа мен саусузланы ышаргъанларын, «Сау бол, мени ол дуниядан къайтаргъанса!» - деп, ыразы болгъанларын санайма», - дейди Халимат.
Холаланы Марзият.
