Кёп болмай «Газпром» биригиуню   правленини келечиси, департаментини таматасы  Владимир Марков  бла «Газпром межрегионгаз» биригиуню генеральный директору Сергей Густов бардырып, ишчи  кенгеш болгъанды. Анга  кёк отлукъ бла жалчытхан компанияны  Шимал-Кавказ федерал округда бёлюмлерини таматалары  эм башхала къатышхандыла.  Анда   газ ызны инсанланы юйлерине  дери хакъсыз тартыуну  РФ-ни Президенти Владимир Путинни башламчылыгъы бла бардырылгъан  программа къалай толтурулгъанына къаралгъанды.
  Къабарты-Малкъарда жашагъанладан чеклерине дери  газ тартыргъа тилегенлени саны  4,7 мингнге жетгенди. Аланы асламысы неда 4,6 минг чакълысы къабыл этилип, келишимлеге кёчюрюлгендиле эм 4,3 мингине  газ тартылгъанды. Бюгюнлюкде да 5,5 минг арбазгъа аллай онг тапдырылырча этилгенди. Саулай алып айтханда, программаны толтуруу  бла республика  регионланы арасында  онбиринчи жерни алады.
Къабарты-Малкъарда  газ ызланы кёбейтиу эм кёк отлукъ  бла жалчытыу   программаны кезиуюнде  2021-2025 жыллада эллеге тартылгъан беш ыз  бла арбазлагъа газ ётдюрюрге  жарагъанды. Андан сора да, эллени биринде  жюз арбазгъа кёк отлукъ тартылырча мадар этилгенди.