Нальчикде Музыка театрда  республиканы  халкъ коллективлерини  «Мени туугъан жерим – Къабарты-Малкъар!» деген ат бла  бардырылгъан  фестивальларыны гала-концерти болгъанды. Ол  Россейни халкъларыны бирлигини жылына жораланнганды. Анга  100-ден артыкъ халкъ чыгъармачы  коллектив  къатышханды.   
Театрны биринчи бла экинчи къатларында  да фестивальгъа къатышхан жыр-тепсеу къауумланы  юслеринден хапарлагъан суратладан, материалладан кёрмючле  къуралгъандыла. Концертге келгенледен кёпле, аланы жокълап, андагъы экспонатлагъа уллу эс буруп къарагъандыла.  
Ызы бла концерт залгъа кирип, сахнагъа миллет кийимлери бла чыкъгъан артистлеге толкъун къарсла бла тюбегендиле. Къонакъланы, чыгъармачы коллективлени да  КъМР-ни маданият министри Мухадин Кумахов алгъышлагъанды.  
– Бу аламат байрамды. Къууанч бергенден сора да, халкъ чыгъармачылыкъны айнытыуда, сюйген республикабызны ниет  байлыгъын жангырыуда жангы атламды. Кёп миллетли регионубузну маданиятыны тереги мындан ары ёсе, жашнай, тамырларын терен ие барлыгъына  мен ишексизме. Бюгюн халкъ коллективге къатышханла тамбла профессионал къауумлагъа къошуллукъларына ийнанама. Маданият а къайда да хорламлы болсун! – дегенди министр. 
Ызы бла ол хычыуун жумушха кёчгенди – 105 коллективни башчысына дипломла, энчи буклетле да бергенди. Аланы алгъышлай, ол: «Бу саугъала  сиз кёпжыллыкъ къыйыныгъыз, искусствогъа кёлюгюз бла къуллукъ этгенигиз эмда миллет адет-тёрелени сакълаугъа, байыкъландырыугъа  юлюшюгюзню къошханыгъыз ючюн тийишли болгъансыз.   Сёзсюз, сизни хар биригиз да хорламлысыз. Нек дегенде  халкъ  жырларыгъыз, тепсеулеригиз бла  эллеригизде, шахарларыгъызда къараучуларыгъызгъа  къууанч келтиресиз», – дегенди. 
Андан сора сахнагъа, бир бирлерин алышындыра, жыр-тепсеу  къауумла чыгъадыла. Къараучула биринчи  эм эрттегили коллективледен бири – Чегем райондан «Чегем чучхурла» халкъ ансамбльге къарсла бла тюбегендиле. Ызы бла Элбрус райондан «Хардар» халкъ тепсеую бла   «Салам» ансамбль чыгъады.  Черек районну «Къууанч»  ансамблини «Жортууул» тепсеуюне да залда олтургъанла сюйюп къарагъанларын къарсла бла билдиргендиле. 
Сахнагъа абаданла бла тенг сабий эмда жаш тёлю чыгъармачы къауумла  да чыкъгъандыла. Аланы араларында «Тауланы сабийлери», «Шагди», «Мечта» эм башхала бар эдиле. 
Ахырында сахнада «Мени туугъан жерим – Къабарты-Малкъар!» деген  музыкалы-хореография композиция кёргюзтюледи. Анга республиканы халкъ коллективлери барысы да къатышхандыла. 
Фестивальны  Музыка театрда бардырылгъан ахыр кезиую, сёзсюз, эм магъаналы эмда эсде къалырча болгъанды. Миллет адет-тёрелени, халкъланы маданият хазналарын  сакъларгъа кереклисин дагъыда бир кере эсге салгъанды, республикада жашагъан миллетлени араларында айырмалыкъ болмагъанын да кёргюзтгенди. 

Холаланы Марзият.