Урысей ФСИН-м и управ­ленэу КъБР-м щыIэм щы­зэхалъ­хьэжащ 2025 гъэм я лэжьыгъэм кърикIуахэр. 

ЗэIущIэм хэтащ ЦIыхум и хуитыныгъэхэмкIэ уполно­моченнэу КъБР-м щыIэ Зумакулов Борис,  Экономикэ, жы­лагъуэ шынагъуэншагъэмкIэ и советым и ­сек­ретарь Тату Казбек, фе­­деральнэ инспектор нэхъыщх­ьэу КъБР-м щыIэ Василь­ченкэ Дмитрий, республикэм и прокурорым и  къуэдзэ Гаврилов Дмитрий, Сабийм и хуитыныгъэхэмкIэ уполно­моченнэу КъБР-м щыIэ Бэд­ракъ Iэминэ, къэрал кIуэцI Iуэ­ху­­хэмкIэ министру КъБР-м щыIэ, полицэм и генерал-лейтенант Крючков  Вячеслав, щIы­налъэ Жыла­гъуэ кIэ­лъып­лъакIуэ комис­сэм и унафэщI Бэрсэдж Анатолэ.
Управленэм и унафэщI Демидов Александр къыщып­салъэм къыхигъэщащ тезы­рыр езыхьэкIхэр щаIыгъ щIы­пIэхэр зэрырагъэфIакIуэр. Къап­щтэмэ, илъэс кIуам я Iуэ­хущIапIэ псоми зэгъэ­пэщыжыныгъэ лэжьыгъэхэр щекIуэкIащ. 
- Зыхуей хуэдгъэзащ медицинэ, къабзагъэм, нэгъуэщI зыхуей-зыхуэфIхэм епха пэш­хэр, унащхьэхэр, тезырхэр езы­­­хьэкIхэу хуиту земы­кIуэф­хэм папщIэ пандусхэр дгъэуващ, - жиIащ абы. 
УнафэщIыр тепсэлъыхьащ я лэжьыгъэм и унэтIыныгъэ ­нэхъыщхьэхэу «О пробации в Российской Федерации» федеральнэ хабзэм къигъэув­-хэр пхыгъэкIынри зыхыхьэм зэрехъулIэм, тезырыр щрахьэкI щIыпIэхэм хуит ямыщI хьэпшыпхэр демыгъэхьэным, етIуанэу къыщIэхуэу суд пащ­хьэм ирамышэн папщIэ ­тутнакъхэр зэраущийм, ахэр ­терроризмэмрэ экстремиз­мэмрэ япэIэщIэ щIыным, я лэ­жьапIэ IэнатIэхэм зэрыз­ра­гъэу­жьым, медицинэ и лъэныкъуэкIэ къызэрызэрагъэпэщ  щIыкIэр зэрыра­гъэ­фIа­кIуэм, нэгъуэщI Iуэхухэми гулъытэ зэрыхуащIым, жы­­лагъуэ, хабзэхъумэ IэнатIэ­хэм, конфессиехэм зэрапы­щIам.
Тату Казбек къыщыпса­-лъэм къыхигъэщащ ­УФСИН-м и лэжьакIуэхэм щIыналъэм щытыкIэр зэпIэзэрыту щы­Iэным хэлъхьэныгъэшхуэ зэ­рыхуащIар, щIэпхъаджагъэр гъэмэщIэным адэкIи зэкъуэту телэжьэным зэрыщыгугъыр. Абы къызэрилъытэмкIэ, мыхьэнэшхуэ иIэщ лъэхъуэщым къикIыжахэр гъащIэм хэгъэ­зэгъэжыным, лэжьыгъэкIэ къызэгъэпэщыным. 
Зумакулов Борис жиIащ, я зэгурыIуэныгъэм ипкъ иту, ягъэкъуаншэхэмрэ суд зытращIыхьахэмрэ я хуитыныгъэхэр къызэпамыудыным зэрыкIэ­лъыплъыр, къыхигъэщащ тезырыр щагъэзэкIуэж IуэхущIапIэхэм кIуэурэ абыхэм щаIыгъхэм зэрахуэзэми  мыхьэнэшхуэ зэриIэр. 
Зэрызэдэлажьэм кърикIуа­хэм щытепсэлъыхьым, Бэд­ракъ Iэминэ жиIащ следственнэ изолятор №1-м ба­лигъ мыхъуауэ щаIыгъхэм, апхуэдэуи сабий цIыкIухэр зиIэхэу тезырыр зыпшыныж цIыхубзхэм дзыхь нэхъ къы­хуащI зэрыхъуар. 
Гаврилов Дмитрий къыхигъэщащ суд зытращIыхьу  зи къуаншагъэхэр ямыгъэтIы-су зрагъэпшыныжхэм къыт­  рагъэзэжу щIэпхъаджагъэхэр щалэжьыр процент 40-кIэ нэхъ мащIэ зэрыхъуар. Те­зырыр щрахьэкI IуэхущIапIэхэми а бжыгъэр зэрыщехыр. 
ЗэIущIэм Iуэху гуапэкIэ къыпа­щащ. УФСИН-м и уна­фэ­щIым илъэс куэд хъуауэ къазэрыдэлажьэм папщIэ фIыщIэ тхылъхэр яритащ Жылагъуэ кIэлъыплъакIуэ ­комиссэм и унафэщI Бэрсэдж Анатолэрэ секретарь Созаевэ Алкэрэ.
Демидов Александр я къалэнхэм къыщыхэжаныкIа я лэжьакIуэхэм яритащ Державин Гавриил и медалхэр, Урысей ФСИН-м и щIыхь тхылъ­хэмрэ Тезырхэр егъэп­шы­нынымкIэ федеральнэ къу­лыкъум и унафэщIым и фIы­­щIэхэмрэ.
КъБР-м щыIэ УФСИН-р 2026 гъэм нэхъыщхьэу зэлэ­жьыпхъэхэр  яубзыхуащ зэIущIэм и кIэухыу. 
УЭРДОКЪУЭ Женя.