Правительствэм и Унэм щекIуэкIащ «КъБР-м и муниципалитетхэм я зэгухьэныгъэм» и советым и зэIущIэ. Ар иригъэкIуэкIащ зэгухьэныгъэм и правленэм и унафэщI Пэнагуэ Максим. ЗэIущIэм къыщаIэтащ Iуэхугъуэ зэхуэмыдэхэр, щагъэбелджылащ къалэхэмрэ районхэмрэ псэу­кIэр щрагъэфIэкIуэн папщIэ зытетыну мардэхэр.
2026 гъэм зэгухьэныгъэм илэжьыну яубзыхуа­хэм теухуауэ къэпсэлъащ зэгухьэныгъэм и унафэщI Маслов Николай. Ар къытеувыIащ ассоциацэр илъэс 20 зэрырикъум и щIыхькIэ мы гъэм лэжьыгъэ пыухыкIахэр зэрырагъэкIуэкIынум. КъБР-м и АСМО-м и тхыдэм теухуауэ тхылъ къыдагъэкIынущ, зэгухьэныгъэм и медалкIэ ягъэлъэпIэнущ зэфIэкI къэзыгъэлъэгъуахэр, къалэхэмрэ щIыналъэхэмрэ псэукIэр щегъэфIэкIуэным хухэха зэпеуэхэр къызэрагъэпэщынущ, зэгухьэныгъэм и илъэс 20-м и щIыхькIэ ди спортсменхэр Iуащхьэмахуэ дэкIынущ. 
2026 гъэр Лъэпкъхэм я зэкъуэтыныгъэм и илъэсу зэрагъэувам къыщы­теувыIащ зэIущIэм. Абы теухуауэ Къэбэрдей-­Балъкъэрымрэ Курск областымрэ я муниципалитетхэм я зэгухьэныгъэ­хэм зэдащIыну Iуэхухэр ягъэбелджылащ. 
Аруан районым и адми­нистрацэм и Iэтащхьэ ЛIы­жьыкъуэ Хьэзрит къэ­псэлъащ щIыналъэм 2024 - 2025 гъэхэм щалэжьам, дызэрыт илъэ­сым зыхунэсын хуейуэ ­ща­­гъэбелджылам теухуауэ.
- 2024 - 2025 гъэхэм къри­у­быдэу Къэбэрдей-­Балъкъэрым и Аруан щIыналъэм щыдгъэ­зэ­щIащ лъэпкъ, федераль­нэ проект щхьэпэхэр. Ахэр хуэунэтIауэ щытащ гъуэ­гухэр гъэтэмэмы­ным, къалэхэр гъэ­дэхэным, егъэджэныгъэм, узыншагъэм, нэ­гъуэщI Iуэхугъуэхэм. 
2024 гъэм «ПсэупIэмрэ къалэм и щытыкIэмрэ» лъэпкъ Iуэхум хэту гъэбелджыла «Къалэ Iэхуит­лъэхуит къызэгъэпэ­щын» федеральнэ про­ек­тым хэту, Аруан райо­ным зыхуей щы­хуэ­д­гъэ-
защ цIыхухэр куэду щызэхуэс щIыпIэ­хэр: Нарткъалэ дэлъэдапIэм деж щыIэ паркыр, Шытхьэлэ дэт къуажэ курыт еджапIэм и Iэгъуэблагъэр, Псыкуэд къуажэкур. КъэдгъэщIэрэщIэжащ Старэ Шэрэдж къуа­жэм Хэку зауэшхуэм хэкIуэдахэм папщIэ дэт фэплъыр. Нарткъалэ деж къат куэду зэтет унэм егъэщIылIа пщIантIищ зыхуей щыхуэдгъэзащ. Жамборэм и цIэр зезыхьэ уэрамым и 82, 84, 86 унэхэм я пщIантIэхэр къэгъэщIэрэщIэ­ным текIуэдащ сом мел­уани 5,2-рэ. Нарткъалэрэ Псыгуэнсурэ щыIэ цIыху­бэ зэхуэсыпIэхэр къызэгъэпэщыным 2025 гъэм текIуэдащ сом мелуани 10,4-рэ. Урысейпсо онлайн хэхыныгъэм тету, 2026 гъэм къапщытахэм ящыщу, нэхъыфIу къызэгъэпэща щIыпIэхэм хабжащ Нарткъалэ и ут нэхъыщхьэр. АдэкIэ ди мурадщ Аруан, Старэ Шэрэдж дэлъэдапIэхэр дгъэдэхэну, - жиIащ Хьэз­рит, икIи и псалъэм пищащ. - Гъуэгухэр зыхуей хуэгъэзэным тещIыхьа федеральнэ проектым тету, Къэхъун Iэщышхуэ щаIыгъ и щIыпIэм хуэкIуэ гъуэгур, километр 0,7-рэ хъур, зэдгъэпэщыжащ, абы текIуэдащ сом мел­уани 9,86-рэ. Зыхуей хуэд­гъэзащ Шэ­рэджы­псым телъ, метр 90 зи кIыхьагъ лъэмыжыри. 
«Управдор» проектым хэту, 2025 гъэм Старэ Шэрэдж къуажэм и уэ­рамхэр электрокъарукIэ къэгъэнэхунымкIэ лэ­жьы­гъэшхуэ щекIуэкIащ Аруан районым. Старэ Шэрэдж - Котляревск, Ста­рэ Шэрэдж - Жэмтхьэлэ - Сукан Су гъуэгу­хэр, Лениным, КIуа­щым я цIэхэр зезыхьэ уэрамхэр зыхуей хуагъэзащ. Зэхэту километри 9,274-рэ къагъэнэхуащ. Уэздыгъэ зыфIадзэ пкъо 213-рэ ягъэуващ, «светодиоднэ» жыхуаIэм хуэдэ уэздыгъэ 377-рэ фIадзащ, электрокъару зрикIуэ кIа­п­сэхэр уэрамхэм щызэпрашащ. Нарткъалэ - Къэхъун - Правоурванск, Ста­­рэ Шэрэдж - Чёрнэ Речкэ, Налшык - Нарт­къа­лэ автомобиль гъуэгу­хэр къагъэнэхуащ. Лэ­жьы­­гъэр зэфIахащ Къэбэрдей-­Балъкъэрым и гъуэгу фондым и ахъшэ­кIэ.
2026 гъэм ялэжьынухэм щытепсэлъыхьым, районым и унафэщIым къыхигъэщащ Нарткъалэ и уэрамхэу Лениным, ШэджыхьэщIэм, Ахъмэ­тым я цIэхэр зезыхьэхэр япэу ягъэтэмэмынухэм зэращыщыр. 
ПсэупIэ коммунальнэ Iуэхутхьэбзэхэр егъэ­фIэ­кIуэнми гулъытэ игъуэтащ. 2025 гъэм Къэхъун къуажэм щаукъуэдиящ псы бжьамий километри 9. Иджы ар унагъуэ 400 хуэдизым ялъэIэсынущ. Мы Iуэхум текIуэдащ сом мелуан 49,1-рэ. 
Егъэджэныгъэмрэ узыншагъэр хъумэнымрэ я гугъу пщIымэ, щIыналъэм щекIуэкIащ ахэр егъэфIэкIуэным хуэгъэза Iуэхугъуэхэр. Нарткъалэ дэт курыт еджапIэ етIуа­нэм гуащIыхьащ сабий 400 зыщIэхуэн пэшхэр. 2025 гъэм «Унагъуэ» лъэпкъ проектым хэт «Унагъуэм зыщIэгъэ­къуэн» Iуэхум тету, Старэ Шэрэдж щаухуащ цIыхуи 100 зрашэлIэну сабий сад. Абы текIуэдащ сом мелуани 139,13-рэ. Старэ Шэрэдж, Шэрэдж Ищхъэрэ къуажэхэм къыщызэIуахащ амбулаторэ­щIэ­хэр. 
2026 - 2027 гъэхэм ­къриубыдэу сабий садхэр щаухуэнущ Псыгуэнсурэ Аруанрэ. Псыкуэд, Шэрэдж Ищхъэрэ, Старэ Шэрэдж, Нарткъалэ дэт сабий садхэр зэрахьэнущ. 
ЗэIущIэм хэтахэр зэгу­рыIуащ къалэхэмрэ щIы­налъэхэмрэ псэукIэр щегъэфIэкIуэным теухуауэ лэжьыпхъэхэм нэхъри гулъытэ хуащIыну, зэгу­хьэныгъэм къызэригъэ­пэщ зэпеуэхэм жы­джэ­ру хэтыну, узыншагъэр хъу­мэным, егъэджэныгъэм, коммунальнэ Iуэху­тхьэ­бзэхэм теухуауэ щыIэ Iэмалхэр егугъуу къагъэ­сэбэпыну. 
Тхыгъэри сурэтри
ГУГЪУЭТ Заремэ ейщ.