КъБР-м и Iэтащхьэ КIуэ­кIуэ Казбек видео зэ­-пы­щIэныгъэ IэмалкIэ хэтащ псы къиухэмрэ 2026 гъэм мафIэсым нэхъ щыхуэ­сакъыпхъэ зэма­нымрэ ­захуэгъэхьэзы­­ры-ным теу­хуа урысейпсо зэIущIэм. 

УФ-м и Правительствэм и УнафэщIым и къуэдзэ Патрушев Дмитрий иригъэ­кIуэкIа зэIущIэм хэтащ   Урысей Федерацэм граждан зыхъу­мэжыны­гъэм­кIэ, къы­зэры­мыкIуэ щы­тыкIэ гугъу­хэмрэ дуней къэхъу­къащIэ шынагъуэхэм кърикIуэхэр гъэзэкIуэжынымкIэ и министр Куренков Александррэ УФ-м щIыуэпсым и хъу­гъуэфIыгъуэхэмрэ экологиемкIэ и министр Козлов Александррэ. 
Зытепсэлъыхьа Iуэхугъуэ­хэр псыежэххэр къиункIэ, мафIэсхэр къэхъеинкIэ нэхъ щышынагъуэ лъэхъэнэм ­зы­хуэгъэхьэзырын зэрыхуей щIыкIэхэрщ, дызэрыт илъэс­­ми абы ипэкIи гъатхэм псыежэххэм зэрызаубгъу щIыкIэм, мафIэсхэр нэхъ къыщыхъу лъэхъэнэм елъы­тауэ, абыхэм зэрапэщIэт ­гидротехникэ Iэмэпсы­мэ­хэм­рэ къинэмыщI Iэмалхэмрэ зэрагъэхьэзырыпхъэм къы­хэкIыу. 
Къэбэрдей-Балъкъэрым псыр къиункIэ шынагъуэу щыщытыр мэлыжьыхьымрэ фокIадэмрэ я зэхуакурщ. Илъэс блэкIам апхуэдэ щытыкIэ гугъухэм республикэр щахъумэну Iэмал зрагъэгъуэтащ. Дызэрыт илъэс­ми республикэм и псыежэх псоми псыр къиункIи зэрыхъунум хуэгъэза лэжьы- гъэ щрагъэкIуэкIынущ. Абы къы­зэ­щIиубыдэнущ километри 9-м нэс. 
Илъэс блэкIам мэзхэм ящыщу зыри мафIэсым зэ­щIищтакъым. Иджыпсту гъэм и кIуэцIкIэ мафIэ­сым щыхуэсакъыпхъэ зэ­маным зыхуагъэхьэзыр, ар къамыгъэхъун папщIэ. Псалъэм и хьэтыркIэ, район, къалэ псоми мафIэсым зэрыпэщIэувэ Iэмэпсымэхэр хьэзыру щаIыгъ зэпытщ. Мэзыр мафIэм зэщIищтэ хъумэ, къагъэсэбэпыну техникэр зэ­пэщщ, лэжьакIуэхэр я IэнатIэм Iутщ. 
ЦIыхухэм мэз лъапэхэм зыщыщагъэпсэхукIэ, мафIэм иримыджэгуну, абы нэхъ набдзэгубдзаплъэу ­хуэсакъыным хуэгъэхьэзы­рын зэрыхуейми и гугъу ящIащ.