ЩIыналъэм и Iуэхухэр зегъэкIуэнымкIэ Центрым и «эфир занщIэм» КъБР-м спортымкIэ и министр Хьэсанэ Ислъам щытеп­сэ­лъы­хьащ республикэм и спорт ­инфраструктурэр егъэ­фIэ­кIуэным, IэнатIэр IэщIагъэлI­хэмкIэ къызэгъэпэщыным ехьэ­лIауэ ялажьхэм, «Къуа­жэм тренеру щылажьэ» къэ­рал программэр зэрагъэзащIэ щIыкIэм, нэгъуэщIхэми.
 
Спорт ухуэныгъэу нэгъабэ къызэIуахамрэ къагъэщIэ­рэ­щIэжамрэ ягу щищIым, министрым къыхигъэщащ, «Налшык» спорт комплексыр къы­зыхуэтыншэу зэрызэрагъэ­пэ­щыжар лэжьыгъэ нэхъ инхэм зэращыщыр. Сыту жыпIэмэ, республикэм зэхьэзэхуэу ­щрагъэкIуэкIым и нэхъыбэр щы­­зэхуашэсыр аращ икIи сыт щыгъуи абыхэм хуэхьэзыру щытын хуейщ. 
Апхуэдэуи, Хьэсанэм жиIащ Хьэбэз, Зеикъуэ къуажэхэм иджырей мардэм къитIасэ спорт утыку Iэхуитлъэхуитхэр зэрыщаухуар, Хьэсэней къуа­жэм спорт пэшыщIэ къы­зэ­рыщызэIуахар. 
Илъэс дызыхыхьам министерствэм къыпэщылъ къа­лэнхэм щытепсэлъыхьым ­хьэ­щIэм къыхигъэщащ республикэм и Сабий стадионыр къызыхуэтыншэу зэрызэра­гъэ­пэщыжынур, абы и топ­джэгу губгъуэр зэрызэра­хъуэ­кIынур. 
КъищынэмыщIауэ, гулъытэ хэха хуащIынущ «Спартак» спорт комплексми. Ар зыхуей хуагъэзэнущ КъБР-м и Iэтащ­хьэ КIуэкIуэ Казбек и унафэ­-кIэ икIи япэ ирагъэщыну къалэнхэм хохьэ. Стадионым щрагъэкIуэкIыну лэжьыгъэ­хэм ехьэлIа пэхуэщIэр хьэ­зырщ, сом мелардитIым нэб­лагъи текIуэдэнущ. Иджыпсту къэралым и министерствэ-хэм дэфтэрхэм щытопсэ­лъыхь, ахэр щыпхагъэкI, ауэ езы пэхуэщIэр щрагъэжьэну пIалъэр наIуэу щыткъым. 
Республикэм и спорт Iэ­натIэр IэщIагъэлIхэмкIэ къы­зэ­гъэпэщыным мыхьэнэшхуэ министерствэм щрат, жиIащ Хьэсанэм. Абыхэм хохьэ, 2025 гъэм къыхалъхьа «Къуажэм тренеру щылажьэ» къэрал программэри. Нэгъабэ абы ипкъ иткIэ, цIихуищым лэ­жьыгъэ IэнатIэхэр иратащ. Дызэрыт илъэсми, а лэжьыгъэм пащэу, къызэрыхах зэхьэзэхуэр ирагъэкIуэкIынущ.
Абыхэм нэмыщI, КъБР-м и Iэтащхьэм и унафэкIэ, спортым ехъулIэныгъэфIхэр ­щызиIэ ди спортсменхэмрэ ­тренерхэмрэ ират ахъшэм ­ху­щIагъуащ икIи ар абыхэм ­щIэгъэкъуэныфI яхуэхъуащ. 
Хьэсанэ Ислъам «эфир занщIэм» щыжиIащ, IэрыщI мыл зэрылъ спорт ухуэныгъэм зегъэубгъуным мыхьэ-нэ ин зэрыратыр икIи 2027 гъэм «Налшык-Арена» уардэунэм и етIуанэ Iыхьэр ухуэным пэрыхьэнущ. Залы­щIэм и фIыгъэкIэ спортсменхэм Iэмал яIэнущ зэман нэхъыбэкIэ загъэсэну, зэхьэ­зэхуэхэри щрагъэкIуэкIыну. 
Апхуэдэуи, КъБР-м спортымкIэ и министрым «эфир занщIэмкIэ» цIыхухэм зэ­ры­зыхуагъэза упщIэхэм жэуап­хэр яритыжащ. Ахэр нэхъыбэу теухуат щIыналъэм щрагъэкIуэкI спорт ухуэныгъэхэм зэрыкIэлъыплъ щIыкIэхэм, спортым дихьэх цIыхухэм я бжыгъэм къызэрыхэхъуэм, щIалэгъуалэмрэ сабиймрэ гъащIэ узыншэм къы­хэ­шэ­нымкIэ лэжьыпхъэхэм, нэ­гъуэщI­хэми. 

ХЬЭЩЫКЪУЕЙ Олег.