В.М.Коков атлы Къабарты-Малкъар къырал аграр университет студенти Асланланы Тамерлан бу кюнледе Москвада бардырылгъан Битеуроссей студент оюнланы финалында боевой искусстволадан биринчи жерге чыкъгъанды.
Жаш халкъла аралы класслы устады, 2015-2016 жыллада Россейни биринчилигинде эки кере хорлам болдургъанды, 2015 жылда дагъыда дунияны биринчилигинде алгъа чыкъгъанды, юч жыл мындан алгъа уа Европаны биринчилигинде доммакъ майдалгъа тийишли болгъанды. 2017 жылда Россейни чемпионуду, 2018 жылда дунияны чемпионатыны доммакъ майдалыны иесиди.
Тамерлан гитче заманындан бери да спортну сюйген, дайым да алгъа итиннген жашды. Аны анасы, атасы да ол гитче заманында дунияларын алышхандыла, ёсдюрген а ыннасы этгенди. Кикбоксинг бла уа спортчу 2013 жылда жарау этип башлагъанды. Аны мураты - белгили гёжеф болуп, ёсюп келген тёлюге юлгю болууду.
Тамерланны Айдина Саралидзе юйретеди. Жаш 86 килограмм ауурлукъда эришеди. Финалда ол чеченли жаш бла тюбешгенди.
"Манга хорлам къыйын берилгенди, деп айтыргъа сюймейме, мен олсагъат финалгъа чыкъгъан эдим, чеченли жаш да бек кючлю эди, алай ол кюн насып мени жанлы болгъанды",- деп эсгереди Тамерлан.
Спортчу жаш жарауларына, кесин не жаны бла да айнытыугъа уллу эс бурады. Спортдан, билим алыудан бош заманында китап окъургъа сюеди. "Жашауда къаллай билим да хайырлыды",-дейди.
