РусГидро компанияны Къабарты-Малкъарда бёлюмюню келечилери, Росрыболовствону Запад-Каспий управлениясыны специалистлери бла бирге бу кюнледе Терк суугъа эмда анга къошулгъан черекчиклеге каспий лосось чабакъчыкъладан 300 мингден артыгъын жибергендиле. Саулай айтханда, быйыл компанияны себеплиги бла суулада аланы саны 700 мингнге, ахыр беш жылны ичинде уа эки миллионнга кёбейгенди, деп билдиргендиле бёлюмню пресс-службасындан.
КъМР-ни табийгъат байлыкъла эм экология министри Шауаланы Илияс: «Компанияны, электрокючню чыгъарыуда сууланы хайырланнганы бла бирге, аланы сакълаугъа, алада болгъан байлыкъны кёбейтиуге да жууаплы кёзден къарагъаны бек игиди», - деп чертгенди. Быллай мадарла Къызыл китапха тюшген чабакъланы санын кёбейтирге себеплик этеригин да белгилегенди ол.
Бу акцияны РусГидро биринчи кере 2003 жылда Узакъ Востокда бардыргъанды. Ол заманда Амур тийреледе Бурей ГЭС-ни огъары жанында кёлге 36 минг чабакъчыкъ жиберилгенди. Ызы бла бу ахшы башламчылыкъгъа компанияны Къабарты-Малкъарда, Дагъыстанда, Къарачай-Черкесде, Шимал Осетияда бёлюмлери, Новосибирск, Саратов, Жигулёвск, Воткинск, Чебоксары, Къобан ГЭС-ле эм Чувашияда ток сатыу бла кюрешген предприятие да къошулгъандыла. Андан бери бу регионлада суулагъа стерлядь, осётр, калуга, акъ амур, карп, толстолобик, сазан, форель, лосось эм башха чабакъладан бир талайы жиберилгенди. Аланы бир кесеги уа Къызыл китапха тюшгенледиле.