Бу кюнледе Россей Федерацияны МЧС-ини Башчысы Александр Куренков Къабарты-Малкъаргъа ишчи жумуш бла келгенди, ол регион ведомствону бёлюмлеринде иш къалай къуралгъаны бла шагъырейленнгенди. Аны юсюнден республиканы оноучусу Казбек Коков МAX платформада кесини каналында билдиргенди.
Алгъа Александр Куренков Къыйын болумлагъа тюшгенлеге оноу этген араны иши бла шагъырейленнгенди. Анда алтмышдан аслам специалист ишлейди, регионда оператив болум не халда болгъаныны юсюнден 50 билдириу берген система хайырланылады. Дагъыда ол къыйын болумланы алгъадан билиу эм аланы хаталарын кетериу жаны бла иш къалай къуралгъанына къарагъанды.
Озгъан жылда республикада беш къыйын болум болгъанды эм тёрт кере социал магъанасы болгъан къоркъуу чыкъгъанды. Ала барысы да МЧС-ни кючю бла кетерилгендиле. Ведомствону келечилери от тюшген жерлени ёчюлтюрге 2500 кереден аслам баргъандыла эм авария-къутхарыу ишлеге да къатышхандыла. Битеу айтылгъан жерлеге къутхарыучула мычымай жетгенлерини хайырындан тюшген хаталаны ёлчемлери аз болгъандыла.
Александр Куренков буюрулгъан жумушларын айырмалы толтургъанлагъа ведомстволу саугъаланы бергенди.
Андан сора федерал министр МЧС-ни Къабарты-Малкъар Республикада Баш управлениясына келгенинде, республиканы оноучусу Казбек Коков бла жангы энчи техникагъа къарагъандыла. Федерал эм республикалы бюджетледен бёлюнюп, 15 автомашина мажарылгъанды, ала от тюшгенде хайырланырча эм авария-къутхарыу ишлени 30 метр бийикликде бардырырча энчи оборудованияла бла жалчытылыныпдыла.
Техника жаны бла аллай иги онглары болгъаныны хайырындан, къыйын болумланы кезиулеринде ишлени терк эм къыйматлы этерге, от тюшгенни да мычымай ёчюлтюрге онг барды, деп айтылады билдириуде.