ЩIышылэм и кIэух махуэхэм КъБКъУ-м щекIуэкIащ «ЮНПРЕСС» егъэджэныгъэ-хэзыгъэгъуазэ программэр. Медиаэкспедицэр журналист ныбжьыщIэхэм папщIэ иджы япэу щрагъэкIуэкIыу аращ Кавказ Ищхъэрэ федеральнэ щIыналъэм. АбыкIэ я мурад нэхъыщхьэр - къэралым и щIыналъэхэм щIэныгъэмрэ, щэнхабзэмрэ теухуауэ я Iуэху зыIутым класс нэхъыжьхэм щIэс еджакIуэхэр щыгъэгъуэзэнырщ.
Налшык щекIуэкIа медиаэкспедицэм хэтащ хэгъэгу 11-м къикIа журналист, блогер ныбжьыщIэу 14. Зи ныбжьыр илъэс 14 - 17-м ит щIалэхэмрэ пщащэхэмрэ къикIат Москва областымрэ Санкт-Петербургрэ къыщыщIэдзауэ Чувашиемрэ Красноярск краймрэ нэс.
- Кавказыр ди къэралым и щIыналъэ телъыджэщ. Сэ сыщогугъ мы гупым щIэ куэд къащIауэ, Къэбэрдей-Балъкъэр Республикэр нэгъуэщIхэм къахэзгъэщхьэхукIым и щхьэхуэныгъэ нэхъыщхьэхэм, щэнхабзэм, хабзэм, лъэпкъ куэду зэрызэхэсым теухуауэ фIагъ лъагэ зиIэ контент ягъэхьэзырауэ ягъэзэжыну. Ди программэм и етIуанэ Iыхьэр - щIыпIэ школакIуэхэм ядэлэжьэнырщ. ХьэщIэ ныбжьыщIэхэм зэрагъэцIыхуащ медиам щыхуагъасэ «ДыгъафIэ къалэ» лицейм и еджакIуэхэр икIи ахэр хагъэгъуэзащ я IэщIагъэм теухуауэ яIэ зэфIэкIым хэкIыпIэ хуэхъуам, - къыхигъэщащ Ломоносовым и цIэр зезыхьэ МКъУ-м ЖурналистикэмкIэ и факультетым и доцент Аникинэ Марие.
Iуэхум хэта цIыкIухэр щIэныгъэлIхэм яIущIащ, лекцэ зэIухахэм щIэсащ, егъэджэныгъэ центрхэм, музейхэм, щIэныгъэ лабораторэхэм зыщаплъыхьащ, университетым щеджэхэм, щылажьэхэм епсэлъылIащ. Медиаэкспедицэм и къызэгъэпэщакIуэхэмрэ хэтхэмрэ КъБКъУ-м и центр, лабораторэ зыбжанэм кIуащ. Абыхэм ящыщщ Прогрессивнэ материалхэмрэ аддитивнэ технологиехэмкIэ центрыр, «Альтаир»-р, «Эрмитаж-Кавказыр». Журналист ныбжьыщIэхэр махуищкIэ ди республикэм зэрыщылэжьам, щалъэгъуам, щызэрагъэщIам теухуа тхыгъэхэр социальнэ сетьхэм щаIэ напэкIуэцIхэм, проектым и сайтым къралъхьэнущ.
«Иджырей щIэныгъэм тетхыхь журналистыр щIэныгъэлIхэмрэ щIэджыкIакIуэхэмрэ зэпызыщIэщ, иужьрей къэхутэныгъэхэр цIыхухэм ящIэнымкIэ сэбэп мэхъу икIи бзэ гурыIуэгъуафIэкIэ Iуэхугъуэ гугъухэр ягъэбелджылыф, – жеIэ «ЮНПРЕСС»-м и эксперт, AIRI Институтым и PR-менеджер Певная Елизаветэ. - Журналист хъунухэм бгъэдыхьэкIэщIэхэр къагупсыс икIи упщIэхэр къагъэув, абыхэм IэнатIэм щIэ гуэрхэр къыхалъхьэ, дунейпсо щIэныгъэм теухуа гупсысэхэм зыщыбгъэгъуэзэну Iэмал къуат.
Проектым и япэ махуэм СПбГУ-м Дунейпсо зэхущытыкIэхэм я теориемрэ тхыдэмкIэ и кафедрэм и доцент, КъБКъУ-м и Егъэджэныгъэ-производственнэ студием и редактор нэхъыщхьэ Лисеев Роман тепсэлъыхьащ республикэм журналист IэщIагъэлIхэр зэрыщагъэхьэзырым, КъБР-м Бжыгъэ зыужьыныгъэмкIэ, связымрэ цIыхубэ зэпыщIэныгъэхэмкIэ и министерствэм ХъыбарегъащIэ IэнатIэхэмкIэ и къудамэм и унафэщI Романовская Аннэ и гугъу яхуищIащ «КъБР-Медиа» медиахолдингымрэ республикэм и хъыбарегъащIэ IэнатIэмрэ зыхуэдэм, щIыналъэ проектхэм. ЩIалэхэмрэ пщащэхэмрэ яфIэгъэщIэгъуэнт Къэбэрдей-Балъкъэрым ис лъэпкъхэм я щыIэкIэ-псэукIэм епха Iуэху зэIумыбзхэр, я гупсысэкIэр. ЕджакIуэхэр яужь ихьащ я эзакъуэу, гупу ятхыну тхыгъэхэм, ягъэхьэзырыну къэхутэныгъэхэм.
«ЮНПРЕСС»-м къэралым и щIыпIэ зэмылIэужьыгъуэхэм щыщ еджакIуэхэр Урысейм и къалэхэм ирегъэблагъэ, а хэгъэгум щIэныгъэм зэрыщызиужьыр, псэукIэр къагъэлъэгъуэну. Абы къыдэкIуэу ныбжьыщIэхэм контент къагъэщIыфу зырагъасэ икIи щIэныгъэлIхэм я къэхутэныгъэ телъыджэхэр хэIущIыIу ящI. КъыкIэлъыкIуэ «ЮНПРЕСС» медиаэкспедицэхэр Санкт-Петербург, Якутск къалэхэм щекIуэкIынущ.
ШэрIужь Даянэ.
