Бэрбэч ХьэтIутIэ и цIэр зезыхьэ Къэбэрдей-Балъкъэр къэ­рал университетым къыщызэIуахащ къэралым и щIалэгъуалэ жылагъуэ зэгухьэныгъэ нэхъыщхьэхэм ящыщ зы - «Урысей зэкъуэтым и ЩIэблэ гвардие» урысейпсо жылагъуэ зэщIэхъееныгъэм и къудамэщIэ.

ЗэIущIэм хэтахэм псалъэ гуапэкIэ захуигъэзащ КъБКъУ-м и проректор ГъукIэпщокъуэ Мурат. Абы къыхигъэщхьэхукIащ университетым ныбжьыщIэхэм щагъакIуэ илъэсхэр къэухьым, къарум, лъэ быдэкIэ увыным я зэману зэрыщытыр. «Комсомол лэ­жьыгъэм нэхъыщхьэу къыхэсхар цIыхухэр зэпсэлъэфу, зым адрейр зэхихыу зэрыщытыпхъэрщ. Ар цIыхур жылагъуэм хэзыгъэзагъэ, жэуап­лыныгъэр зыхезыгъащэ дуней тетыкIэщ. Зэманым зе­хъуэж, ауэ зимыхъуэжу къонэ Хэкур фIыуэ лъагъуныр, нэхъы­жь­хэм пщIэ яхуэ­щIыныр, къыщалъхуа щIыналъэм хуэпэжыныр. Но­бэ псом хуэ­мыдэу гулъытэшхуэ зыхуэщIыпхъэр щIэблэм я гум хэкупсагъэр илъхьэнырщ, ахэращ къэкIуэну гъунэгъум адэ-анэ, Iэ­щIагъэлI, щэнхабзэмрэ хабзэмрэ я хъумакIуэ хъунур. Дэ нэ­гъуэщI­хэм я дуней тетыкIэм зыкIэрытщIэн хуейкъым. Дэ ды­зэрыхуейуэ, ди щэнхабзэмрэ хабзэмрэ декIуу дыпсэуныр нэхъ пэжщ», - къыхигъэщащ ГъукIэпщокъуэм. Абы къэралым и шынагъуэншагъэр къызэзыгъэ­пэщхэм фIыщIэ яхуищIри, щIалэгъуа­лэр еджэну, еплъыкIэщIэхэр, хэкIыпIэщIэхэр къагъэщIыну, къэ­кIуэнур яухуэну хуитыныгъэ ин зэраIэр яжриIащ. 
Студентхэм псалъэ гуапэкIэ захуигъэзащ Къэбэрдей-Балъкъэр Республикэм и Парламентым и еханэ зэхуэсыгъуэм и депутат, «Уры­сей зэкъуэтым и ЩIэблэ гвардием» и лэжьыгъэр зэзыгъэуIу советым хэт, зэгухьэныгъэм и щIыналъэ штабым и уна­фэщI Абазэ Альбэч. Ар тепсэлъыхьащ зэщIэхъееныгъэм и му­радхэмрэ и лэ­жьыгъэмрэ, КъБКъУ-м япэ къудамэ къы­щызэIухыныр республикэм и студент щIалэгъуалэм я гъащIэм мыхьэнэшхуэ щызиIэ Iуэ­хугъуэу зэрыщытыр къыхигъэщу. Абазэм зэрыжиIамкIэ, ЩIэблэ гвардиер «Урысей зэкъуэт» партым и щIалэгъуалэ къудамэщ, псэукIэр егъэфIэкIуэным ехьэлIа IуэхухэмкIэ, волонтёр жэр­дэмхэмкIэ, хуэныкъуэхэм защIэгъэкъуэнымкIэ дэIэпыкъуэгъу ­хъууэ.
«2022 гъэм ди зэгухьэныгъэращ хуит къащIыжа щIыналъэхэм япэ дыдэу волонтёрхэр зыгъэкIуар, гугъуехь пэщIэхуа цIыхухэм ядэIэпыкъун папщIэ», - жиIащ абы. Абазэ Альбек ехъуэхъуащ ­къудамэщIэм и унафэщIу хаха Балъкъыз Альберт ехъулIэныгъэхэр иIэну, икIи жриIащ щIыналъэ штабым университетым щыIэну ­къудамэм сыт и лъэныкъуэкIи зэрызыщIигъэкъуэнур. 
Зэхыхьэм и кIэухыу «Урысей зэкъуэтым и ЩIэблэ гвардие» урысейпсо жылагъуэ зэгухьэныгъэм и япэ къудамэр университетым къыщызэIухыным теухуа зэгурыIуэныгъэм Iэ щIадзащ. 

Шыпш Даянэ.