Къэбэрдей-Балъкъэрым и Iэтащхьэ КIуэкIуэ Казбек IущIащ лэжьыгъэ IуэхукIэ республикэм къэкIуа, Урысей Федерацэм граждан зыхъумэ­жыныгъэмкIэ, къызэры­мы­кIуэ щыты­кIэхэмрэ щIыуэпс къэхъукъащIэ шынагъуэ­хэм кърикIуэхэр гъэзэкIуэжынымкIэ и ми­нистр­ Куренков Александр. Ахэр тепсэлъыхьащ туристхэр куэду республикэм къыщыкIуэ зэманым абы­хэм я шынагъуэнша­гъэр къызэгъэпэщыным, къэхъукъащIэ къы­зэ­­рымыкIуэхэм деж гузэвэгъуэ хэхуахэр къегъэ­лы­ным пыщIа Iуэхухэр нэхъ­ри егъэфIэ­кIуэ­ным.

Iуащхьэмахуэ бгым метр 3900-рэ лъагапIэм ­ху­эзэу щаухуэ альпинист къалэ цIыкIум хэтынущ къегъэлакIуэхэм я егъэзыпIи. ДэIэпыкъуэгъу хуэ­ныкъуэ хъу туристхэм бгыхэм нэхъ щIэх щалъэ­Iэсыфынущ, а ухуэныгъэр зэфIэкIмэ.
Куренков Александр къыхигъэщащ хъыба­р­е­гъащIэ лэжьыгъэми мыхьэнэшхуэ зэриIэр:
- Гулъытэ щхьэхуэ хуэщIыпхъэщ туристхэм, псом хуэмыдэу зи закъуэу, гуп мыинурэ езыр-езыру къэзыкIухьын зыфIэфIхэм, къыхаха гъуэгуанэхэм, ахэр здэкIуэ лъэныкъуэм теухуа хъыбар Урысей МЧС-м и лэжьакIуэхэм ирагъэщIэн зэ­рыхуейр ягурыгъэIуэным. Урысейм и МЧС-м и сайтым абыхэм нэхъ тыншу зыщрагъэтхыфынущ дяпэкIэ.
КIуэкIуэ Казбек министрым жиIахэр диIыгъащ икIи къыхигъэщащ къызэрымыкIуэ щытыкIэ ихуа туристхэр кърагъэлын папщIэ езы къегъэ­ла­кIуэ­хэр псэзэпылъхьэпIэ щихуэ къызэрыхъур. ЦIыху­бэ хъыбарегъащIэ IэнатIэхэм я Iэмал псори къа­гъэ­сэбэпу, нэхъри егъэфIэкIуэн хуейщ зы­зыгъэп­сэхухэм я гъуэгуанэхэм къегъэлакIуэ­хэр щагъэгъуэзэным хуэгъэза лэжьыгъэр.
ЗэIущIэм апхуэдэу щытепсэлъыхьащ гъэмахуэ кIуам Тырныауз ятIэпс къыщыдэуам къегъэла­кIуэхэм я щIыналъэ къудамэм и лэжьакIуэхэм зэфIагъэкIа лэжьыгъэшхуэм. Урысей МЧС-м и унафэщIым пщIэшхуэ яхуищIащ лэжьакIуэхэм я Iэзагъэм. Абыхэм я фIыгъэкIэ яхузэфIэкIащ псыдзэм зэхикъутэнкIэ хъунухэр ягъэмэщIэн, къэхъукъащIэ шынагъуэм и зэран цIыхухэм ирамыгъэкIын. «КъэхъукъащIэм кърикIуахэр щагъэ­зэкIуэжми IэнатIэхэр зэкъуэту зэдэлэжьащ», - къыхигъэщащ абы.
Куренков Александр КIуэкIуэ Казбеки респуб­ликэм и правительствэми фIыщIэ къахуищIащ цIыхухэмрэ щIыналъэмрэ я шынагъуэншагъэр къызэгъэпэщыным зэрегугъум папщIэ.
КIуэкIуэ Казбеки министрым псалъэ гуапэ жриIащ республикэм къызэрыкIуам икIи Урысей МЧС-м и щIыналъэ къудамэм и нэIэ къызэрытригъэтым папщIэ.
Урысей МЧС-м и унафэщI Куренков Александр зыщигъэгъуэзащ КъызэрымыкIуэ щытыкIэхэм ехьэлIа унафэр зыIэщIэлъ центрым и лэжьыгъэм. Абы щолажьэ IэщIагъэлI 60-м щIигъу, щы­тыкIэр зыхуэдэр зрагъэщIэн, къэхъукъащIэ къы­зэрымыкIуэ къыкъуэкI хъумэ абы зэрыпэщIэтын Iэмалхэр убзыхунымкIэ къагъэщхьэпэ хъыбарегъащIэ Iэмэпсымэ зэмылIэужьыгъуэу 50 яIэщ. Илъэс кIуам МЧС-м и лэжьакIуэхэм ягъэтэмэмыжащ къызэрымыкIуэ щытыкIэу тхумрэ социальнэ мыхьэнэ зиIэ къэхъукъащIэу плIымрэ я Iэужьхэр. IэнатIэм и лэжьакIуэхэр 2500-м щIигъурэ гъуэгу техьащ мафIэсхэр ягъэункIыфIын, щытыкIэ гугъу къихутахэр кърагъэлын папщIэ. А Iуэхухэм уна­фэхэр псынщIэу зэрытращIыхьам и фIыгъэкIэ, абыхэм кърикIуэнкIэ хъуну щыта гузэвэгъуэхэр ягъэмэщIэн яхузэфIэкIащ. Министрым IэнатIэм и дамыгъэ лъапIэхэр ятритащ къулыкъур ехьэ­кIыным къыхэжаныкIахэм.
КIуэкIуэ Казбекрэ Куренков Александррэ Урысей МЧС-м и Управленэ нэхъыщ­хьэу КъБР-м щыIэм щыкIуам зрагъэлъэгъуащ зэрылажьэ техникэ хэхахэр. Къэрал, республикэ бюджетхэм я мылъкухэм я хьэкъкIэ къаIэрыхьащ щытыкIэ къы­зэ­рымыкIуэ ихуахэр къегъэлыным къы­хуагъэсэбэп IэмэпсымэхэмкIэ зэгъэпэща автомобиль 15. Ахэр мафIэсхэр гъэункIыфIынми, ­метр 30-м нэблагъэкIэ щыIэ лъагапIэм къегъэ­лакIуэхэр щылэ­жьэнми хуэщIащ. УнафэщIхэм къыхагъэщащ IэнатIэр техникэ лъэщкIэ къызэгъэпэщамэ, къэхъукъащIэ къызэрымыкIуэхэм, мафIэсхэм деж нэхъ псынщIэу дэIэпыкъуэгъу ­хъунымкIэ Iэмал къызэритыр.